दृश्यमा एउटा सरकारी विद्यालयको बन्द परिसर छ । पचास–साठी जना उही उमेर समूहका मान्छेहरू छन् । हातमा जस्तो भेटियो त्यस्तै लाठी, भाटो र बाँसका टुक्राहरू छन् ।
दृश्य यतिमा मात्र सीमित छैन । जसले जसलाई सक्छ, उसले त्यसलाई थला बस्ने गरी हिर्काइ पनि रहेका छन् । कोही कुटाइ खाएर थचारिएका छन् । फेरि उठ्दै अर्कोलाई हान्न दौडिरहेका छन् ।
दृश्य स्थानीय शैक्षिक महाभारतको हो । कथाको सुरुमा थाहा हुँदैन तर उत्कर्षका बेला कोही भाग्ने र कोही नभाग्ने दृश्य देखिए पछि चाहिँ प्रष्ट हुन्छ कि उनीहरू स्पष्टतः दुई पक्षका मानिस रहेछन् ।
सुरुमा कन्टिर–बाबूलाई लागेको थियो यो ‘अपन लाठी अपन राज’ शीर्षकवाला कुनै भोजपुरी सिनेमाको उत्कर्ष–दृश्यको सुटिङ होला । तर होइन रहेछ, यो त साँच्चैको र सम्पादन नगरिएको भिडियो फुटेज पो लिक भएको रहेछ ।
दुई समूह एक–अर्काविरूद्ध आक्रमण–प्रत्याक्रमणमा उत्रिएको उल्लिखित मार–मुङ्ग्रीवाला भिडियो अहिले सामाजिक सञ्जालमा भाइरल भइरहेको छ ।
कन्टिर–बाबूले निकै गम्भीर भएर हेरेको यो भाइरल भिजुअलमा दुवै समूहको झगडाको कारण भने खुल्दैन । तर यो अनपेक्षित दृश्य हेर्दै गर्दा कन्टिर–बाबूको मनमा दुइटा सवाल टड्कारो रूपमा उब्जिए । के यो कार्य उचित हो ? विद्यालय परिसरमा अभिभावकहरूद्वारा प्रस्तुत यस्तो शक्ति प्रदर्शनलाई कुनै तर्कले उचित ठहरयाउन सकिएला ?
रौतहट जिल्लाको माधवनारायण नगरपालिकास्थित श्री माध्यमिक विद्यालय परिसरमा भएको यो लफडालाई ग्रामीण शैक्षिक–क्षेत्रमा देखापरेको सामान्य घटना मान्न सकिन्न भन्ने कन्टिर–बाबूको ठहर छ ।
उक्त विद्यालयको व्यवस्थापन समितिको म्याद सकिएको अवस्थामा हाल सञ्चालन भइरहेको विद्यार्थी भर्ना अभियानका सन्दर्भमा दुई पक्षबीच झडपको स्थिति उत्पन्न भएको थाहा पाएर विचरा कन्टिर–बाबूको मन कटकटी खाएको छ । उनी कुनै पनि नाम र बहानामा हुने यस्ता क्रुर घटनाको धोर भत्सर्ना गर्छन् ।
विद्यालयजस्तो शान्तिक्षेत्र मानिने स्थानमा यस्तो हिंसात्मक क्रियाकलाप गरेर अशान्ति मच्चाउन दुवै पक्षलाई कारवाही हुनुपर्ने कन्टिर–बाबूको माग छ । उनी यसका लागि स्थानीय प्रहरी–प्रशासन र नेपाल सरकारको ध्यानाकर्षण होस् भन्ने आग्रह पनि गर्छन् ।
त्यसो त कन्टिर–बाबूले ग्रामीण क्षेत्रमा हुने ‘लोकल पोलिटिक्स’को रगडा राम्रैसँग बुझेका छन् । विद्यार्थी भर्नामा आफ्नो पक्षको सङ्ख्या बढाएर भविष्यमा विद्यालय व्यवस्थापन समितिको परिणाम प्रभावित गर्न खोज्ने मनसायका कारण झगडाको अवस्था सिर्जना भएको कुरा बुझ्न कन्टिर–बाबूलाई समस्या छैन ।
क्षणिक आवेशयुक्त यस्ता घटनाले आफ्नै बालबालिकाका नजरमा अभिभावकको स्तर र इज्जत दुई कौडीको पनि बाँकी नरहने, दुनियाँसामु आफ्नै गाउँ–ठाउँको बेइज्जत हुने कुरामा भने आइन्दा सचेत रहन अभिभावकसमक्ष कन्टिर–बाबूको आग्रह छ ।
कारण हिजोआज हरेकका हातमा मोबाइल छन् । तिनले अनपेक्षित केही छिरिक्क भयो कि सिसी क्यामेराले जस्तो रेकर्ड गरिहाल्छन् । र छिनका छिनमै भाइरल बनाइहाल्छन् ।
यस्तोमा कन्टिर–बाबूको आग्रह छ– अब आफैँ सोच्नुहोला, यसरी सार्वजनिक ठाउँमा आफूले रामधुलाइ खाएको भिडियो भाइरल भएको अवस्थामा आफ्ना छोरी–बुहारी, ससुरालीतिरका आफन्त, चेला–चपाटी अनि समाजका माझमा शिर ठाडो पारेर कसरी हिँड्ने ? कन्टिर–बाबू भए त लाजले ठाउँको ठाउँ भुतुक्क हुन्थे ।
कन्टिर–बाबू भन्छन्– यदि यो मार–मुङ्ग्रीवाला भाइरल भिडियोमा देखिएका, नदेखिएका घटनामा संलग्न कसैलाई यो घटनामा आफूले खुब बहादुरी प्रदर्शन गरेँ जस्तो लाग्छ भने त्यो जस्तो कुतर्क अर्को हुँदैन ।
