कन्टिर–बाबू त्यसबेला छक्क पर्छन्, जब कोही आवरणमा एकथरि र व्यवहारमा अर्कोथरि भाव प्रदर्शन गर्छन् । भन्न चाहिँ आफूलाई विवेकी भन्छन्, काम भने ठिक विपरीत गर्छन् ।
खैर, यो त व्यक्तिको आफ्नो कुरा न हो, कन्टिर–बाबू त्यसमा के नै गर्न सक्छन् र ?
यस्तै एकजना जो आफूलाई ‘विवेकशील’ भन्छन्, उनको एक दिव्यवाणी यतिबेला सामाजिक सञ्जालमा ‘भाइरल’ भइरहेको छ । उनी भन्छन्– म न त म राजतन्त्रवादी हुँ, न त गणतन्त्रवादी ।
यसअघि यिनी नै सङ्घीयताबारे जनमत सङ्ग्रह हुनुपर्छ भन्ने विचार व्यक्त गरे चर्चित भएका थिए । त्यसो त यी दुवै विचार यिनका आफ्ना व्यक्तिगत विचार हुन् भन्ने कन्टिर–बाबू मान्छन् । तर एउटा कुरा निश्चित छ, दनादन अभिव्यक्त भएका यी दुवै विचार केवल संयोगमात्र नहुन सक्छन् ।
कन्टिर–बाबूलाई उनका विचारहरूसँग त्यति सारो कुनै लिनुदिनु छैन । तर उनको पछिल्लो भनाइबाट कन्टिर–बाबूको मनमा एक जिज्ञासा जन्म हुन पुगेको छ । ठीकै छ, उनी न त राजतन्त्रवादी हुन्, न त गणतन्त्रवादी हुन् । त्यसो भए उनी के हुन् ?
कन्टिर–बाबूले बुझेको कुरो राजा भएको मुलुकमा जुनसुकै शासन पद्धति भए पनि सारमा त्यो राजतन्त्रात्मक नै हुन्छ । नाम केही पनि दिन सकिएला । सन्तोषका लागि संवैधानिक राजतन्त्र भन्न सकिएला । अर्कोतिर राजतन्त्र नभएको अवस्थामा हुने शासन व्यवस्था भनेको गणतन्त्र नै हो । तर यी विवेकीले आफू यी दुवैमध्ये केही पनि होइन भनेर के भन्न खोजेका हुन् ?
राजनीतिमा उभयलिङ्गी हुन पाइन्न होला । कुरो के हो, स्पष्ट नहुँदा उनका कार्यकर्ता र अनुयायी पनि कनफिउजनमा पर्ने होलान् ।
खयर यो पनि उनको कुरा भो । कन्टिर–बाबू सोचिरहेका छन्– अहिले उनले यसरी न यता न उताको कुरा गर्नुको कारण भविष्यमा जतापट्टिको पड्ला भारी हुन्छ, त्यही भाग आफ्नो हो भन्न पाउने च्याँखे दाउ सोचेको पनि हुन सक्छ । किनकि उनको चुनाव–चिन्ह नै तराजु जो छ ।
बाँकी त उनी र उनका समर्थक नै जानुन् ।
