कन्टिर–बाबूलाई पछिल्लो समयमा दिव्यज्ञान अनुभूत भएको छ । उनलाई लागेको छ– अहिले उनले निकै कुरा थाहा पाउन बाँकी छ ।
कन्टिर–बाबू नेपाली काङ्ग्रेसका पछिल्ला गल्तीबाट काङ्ग्रेसलगायत अन्य सबै दलले पाठ सिक्नुपर्ने प्रस्ताव राख्छन् । अहिले काङ्ग्रेस नेतृत्वको सङ्घीय र गण्डकी प्रदेश सरकार विस्तारका सम्बन्धमा पार्टीभित्र र बाहिर तीव्र असन्तुष्टि चुलिएको छ । सङ्घमा स्वार्थ बाझिने गरी शिक्षा र स्वास्थ्य व्यवसायीलाई राज्यमन्त्री बनाइनु र गण्डकीमा सरकार विस्तारका सन्दर्भमा दोबाटे विश्वकर्माको मानमर्दन गरिनुलाई धेरैले मन पराएका छैनन् ।
कहाँसम्म भने महामन्त्री पूर्णबहादुर खड्का स्वयम्ले असन्तुष्ट अभिव्यक्तिको प्रतिनिधित्व गरेका छन् । यसबारे उनले आफ्नो धारणा सोमबार सामाजिक सञ्जालमार्फत सार्वजनिक गरेका पनि छन् ।
अस्ति बालुवाटारमा पार्टीको बैठक आयोजन गर्ने गल्ती त पछि सच्याइएको छ । तर अहिले मन्त्रिपरिषदहरू विस्तारका क्रममा गल्ती भएपछि, त्यसविरुद्ध जनमत निर्माण भएको छ । कन्टिर–बाबू आफैँलाई प्रश्न गर्छन्– के यी निर्णय पनि सच्चिएलान् त ?
कन्टिर–बाबूको मनमा अर्को जिज्ञासा पनि छ– आखिर यस्ता गल्ती हुन्छन् किन ? जानेर या नजानेर ? अरे यार मन्त्री बनाउने कुरा भेन्टा र करेला त होइन नि कि भित्र किरा लागेको कुरा बाहिरबाट थाहा नपाइयोस् ! खयर, यो त तरकारी पकाउनेले नै जानुन् । कन्टिर–बाबूले त खाने हुन्, मिठो–नमीठोको परख गर्छन् नै ।
भनिन्छ, गल्ती जोबाट पनि हुनसक्छ तर मूर्खले मात्र दोहोर्याउँछ । प्रसङ्गवश कन्टिर–बाबू अपेक्षा गर्छन्– देउवा सरकारबाट गल्ती दोहरिने छैन ।
