कुरा गर्यो कुरैको दुःख, नगरो मनको दुःख । घुमीफिरी रुम्जाटार भने जस्तो घुमीफिरी ओल्बाकै कुरा आउँछ । नबोलुँ भन्दा पनि बोल्ने भाउतो कन्टिर–बाबूलाई आइलाग्छ ।
कुरो खरोखास छ । प्रसङ्ग कुराकै छ । ओल्बा बालुवाटारबाट हुत्तिएर बालकोट बुइँगल पुगिसक्दा पनि ‘राजशी’ सोच र बोली भने फेरिएको छैन । यस्तो बेलामा कन्टिर–बाबू मधेसतिर चलनचल्तीको एउटा उखान सम्झिन्छन्– रस्सी जल गया पर बल नही गया । अर्थात् डोरी डढिसक्यो तर बल भने बाँकी नै छ ।
त्यसो त ओल्बाले पछिल्लो पटक गरेको कुराचाहिँ कन्टिर–बाबूलाई मन पर्यो । उनले भने– भावनाका कुरा छोडिदिऊँ, स्वार्थका कुरा छोडिदिऊँ, देशका कुरा गरौँ, जनताका कुरा गरौँ, समस्या समाधानका कुरा गरौँ, पार्टी एकताका कुरा गरौँ ।
कति राम्रो ! गर्नुपर्ने नै त्यही हो । हुनुपर्ने पनि त्यही हो । कुनै बेला आफूहरूले नै लाल गद्दार भनेका पुष्पलाललाई ससम्मान सम्झिँदै ओल्बाले दिएको यही बयान अहिले ट्रेन्डिङमा छ ।
सोही ओल्बाली बयान सुन्दै गर्दा कन्टिर–बाबूलाई लाग्यो– गर्न त बडाउले लगालग एकसाथ ६ वटा कुरा शब्द प्रयोग गरे, कुरा पनि राम्रै गरे । तर दुनियाँलाई थाहा कुराले मात्र चिउरा भिज्दैन । कुराअनुसार काम भइदिएको भए आज यो दुर्दिन देख्नु नै पर्ने थिएन ।
कन्टिर–बाबूलाई अचम्म लागेको एउटा अर्को कुरा पनि छ । ओल्बाले बालकोटको बुइँगलमा माकुनेलाई ‘लाल गद्दार’ भनेको त सबैलाई थाहै छ । त्यसको एक सातामै उनै लाल गद्दार र लाल गद्दारका अनुयायीहरूलाई ‘एमनेस्टी इज ग्रान्टेड’ भनिदिए । जे–जे भएको होस्, सबैलाई एमनेस्टी रे !
तपाईहरूलाई थाहै छ कन्टिर–बाबूको अङ्ग्रेजी तेस्रो भाषा हो । सुरुमा त यस्तो ‘स्टान्डर्ड’ अङ्ग्रेजीमा ओल्बाले के भनेका हुन् ? उनले राम्ररी बुझेनन् । पछि गुगल सर्च गरेर हेर्दा पो थाहा भयो असली कुरो त !
ओल्बाले सबैलाई आममाफी दिन्छु पो भनेका रहेछन् । ज–जसले जे–जे गरे पनि उनले आममाफी दिने रे ! झट्ट सुन्दा कत्रो महान् छाती र मन ओल्बाको जस्तो लाग्छ । तर कन्टिर–बाबूले ओल्बाको यस अभिव्यक्तिमा उही दुईतिहाइवाला शासकीय दम्भ पो देखे ।
नेपालीमा भक्कुमार गाली गरेका ओल्बाले अङ्ग्रेजीमा सजिलै माफी त दिए तर कन्टिर–बाबूलाई लागेको कुरा– उनले गद्दार भन्दैमा गद्दार भइहाल्ने र माफी भन्दैमा माफी भइहाल्ने कस्तो तर्क गरेका हुन् ओल्बाले कु थपेर ?
