अहिले नेपाली समाजमा भइरहेको व्यापक चर्चा कन्टिर–बाबूले आफ्नै चस्मा अड्याउने कानले सुनेका छन्– ओली गए देउवा आए । सामान्य जनताले के पाए ? कागलाई बेल पाक्यो हर्क न विस्मात !
हुन पनि हो, सरकारमा जोसुकै आओस्, नेपाली जनताको जीवनमा कुनै फरक अनुभव गरिएको होइन । उही बेथिति, पछौटेपन, निराशा, सुस्त विकास आदि–इत्यादि सब यथावत् छन् । जुन जोगी आए पनि कानै चिरिएका छन् ।
कन्टिर–बाबू भन्छन्– त्यसो त हरेक सरकारको परिवर्तनले आम जनजीवनमा तत्काल कुनै देखिने खालको सकारात्मक प्रभाव नपरे पनि आसेपासे, हरौटे–भरौटेको जीवनमा भने निकै प्रभाव पर्ने गरेको छ । कम से कम यस पटक यो प्रवृत्तिमा थोरै मात्र पनि बदलाव आएछ वा कमी भएछ भने जनसामान्यका लागि निकै राहत र सन्तोषको विषय हुने कन्टिर–बाबूको ठहर छ ।
त्यसो त लामो समयको ल्याङल्याङपछि ओल्बाको बहिर्गमन र देउवाबाबूको सत्तारोहणले भुइँमान्छेमा एक किसिमको राहत सञ्चार त गरेकै छ । कम से कम नानाथरी उखान–टुक्का सुन्दा–सुन्दा पाकेका कानलाई केही दिन भए पनि आराम भयो भन्ने उनीहरूलाई लागेको छ ।
तर कन्टिर–बाबू यतिबेला ठट्टा गर्ने मुडमा छैनन् । परिवर्तन क्रमलाई नजिकबाट नियालिरहेका कन्टिर–बाबू गम्भीर हुँदै भन्छन्– अरू केही नभए पनि कम्तीमा देउवाबाबू प्रतिगमन र अधिनायकवादको मतियार हुन सक्दैनन् ।
सैद्धान्तिक रूपमा देउवाबाबू इमानदार लोकतन्त्रवादी हुन्, लोकतन्त्रको मूल्य–मान्यताविरूद्ध उनी रत्तिभर पनि सम्झौता गर्ने छैनन् भन्ने कन्टिर–बाबूको अपेक्षा छ । उनी प्रश्न गर्छन्– तर के यतिले मात्र जनताको आवश्यकता र अपेक्षाको सम्बोधन हुन्छ ?
कोरोना कहरबाट आक्रान्त नेपाली जनताका खातिर यतिखेर महत्त्वपूर्ण दुई ‘ख’ प्रमुख आवश्यकता बनेका छन् । पहिलो खोप, दोस्रो खाना । खोपका बारेमा त देउवा सरकारले आफ्नो पहिलो निर्णयमार्फत नै सम्बोधनको प्रयत्न गरेकै देखियो । यो फस्ट इम्प्रेसन लास्टसम्मै कायम रहनसकोस्, कन्टिर–बाबूको शुभकामना छ ।
तर बाँकी छ सवाल खानाको । खाना अर्थात् रोजगारीको । यसबारे पनि देउवाबाबूबाट छिट्टै सोचिने र ठोस जन–उत्तरदायी योजना सार्वजनिक हुने अपेक्षा गर्छन् कन्टिर–बाबू ।
अरू त तपसिलका कुरा हुन् । यस पटक समयले देउवाबाबूलाई आफू प्रमाणित गर्न नसोचेको अवसर दिएको धरातलीय सत्यबारे स्वयम् देउवाबाबू र उनका निकटवर्तीहरू जानिफकार नै होलान् भन्नेमा कन्टिर–बाबूलाई लाग्छ ।
कन्टिर–बाबुका अनुसार देउवाबाबूलाई ओल्बाले जस्तो गफ गरेर समय खेर फाल्ने छुट छैन । होइन, यदि परम्परागत पाराले आसेपासे पोस्ने र गफमात्रै हाँक्ने हो भने जनता रिसाउन समय लाग्दैन ।
koshionline
