‘म देवताकहाँ प्रार्थना कहिले पनि गर्दिनँ । किनभने मैले देखेको छु, मेरोभन्दा बढी आवश्यकता परेका मानिसहरूको प्रार्थना देवताले सुन्न सकेका छैनन् ।’
तपाईहरूलाई थाहा छ कन्टिर–बाबू जननायक बिपी कोइरालाका कति ठुला फ्यान हुन् । कारण बिपीबाबूले भने जस्तो जब–जब देशका बारेमा मनमा कुनै द्विविधा हुन्छ, कन्टिर–बाबू दायाँ–बायाँ केही नहेरी देशको माटो सम्झिन्छन् र निर्णय गर्छन् ।
उनै बिपीबाबूले देवतालाई प्रतीक बनाएर व्यक्त गरेको उल्लिखित विचारको सन्दर्भ कन्टिर–बाबू अहिले चर्चाको शिखरमा रहेको नेपाली काङ्ग्रेसको १४औँ महाधिवेशनको सेरोफेरोमा जोड्छन् ।
कन्टिर–बाबूका अनुसार बिपीबाबूले सङ्केत गरे जस्तै जसरी आवश्यकता परेका मानिसहरूको प्रार्थना देवताले सुन्न सकेका छैनन्, उसैगरी आम कार्यकर्ता पङ्क्तिबाट उठिरहेको आवाज वर्तमान काङ्ग्रेसको पहिलो पङ्क्तिका नेताहरूले सुन्नसकेका छैनन् ।
किनकि समय र आम कार्यकर्ताको माग छ– अब पहिलो पुस्ताले विश्राम लिनुपर्छ । तर लो कर लो बात नेताहरू त बूढो साँढेले जस्तो बाँचुञ्जेल आफैँ ठाउँ ओगटिरहने पो गर्छन् ।
त्यसो त नेतृत्व कसैले किस्तिमा राखेर दिने कुरा होइन, आफ्नै बलबुताले हत्याउने कुरा हो भन्नेमा कन्टिर–बाबू विश्वस्त छन् । तर पनि नेतृत्वको अखडामा खाइ, खेली, डकारी गरिसकेका भेट्रानहरू नै उत्रिएको देखेर कन्टिर–बाबू चकित परेका छन् । यसपटक नेतृत्व परिवर्तनको चाहना राख्ने कन्टिर–बाबूलगायत शुभेच्छुकहरूलाई यो कुरा एक सुता मन परेको छैन ।
कन्टिर–बाबूको प्रश्न छ– के त्यसो भए कन्टिर–बाबूले आफ्नो जीवनकालमा काङ्ग्रेसको नेतृत्व दोस्रो पुस्तामा हस्तान्तरण भएको देख्न पाउँदैनन् त ?
कुरै–कुरामा कन्टिर–बाबू एक पटक सप्तरीका एक जना स्वतन्त्रताका सेनानी केदारप्रसाद सिंहबाट काङ्ग्रेस नेतृत्व र बिपीबाबूको व्यवहारकाबारे केही कुरा सुन्न पाएको सम्झिन्छन् ।
सिंहका अनुसार २०१७ सालको राजनीतिक काण्डपछि बिपीबाबू जेलमा र सुवर्णशमशेर राणा कार्यबाहक सभापति हुनुहुन्थ्यो । पछि जब बिपीबाबू जेलबाट छुटेर पार्टी कार्यालय आउनुभयो, त्यो दिन सुवर्णबाबू, द्वारिकादेवी ठकुरानी, बखानसिंह गुरुङ, केदारप्रसाद सिंहलगायत १०–१२ जना नेता–कार्यकर्ता पार्टी कार्यालयमा हुनुहुन्थ्यो । बिपीबाबू आएको देख्नेबित्तिकै सुवर्णबाबू पार्टी सभापतिको हैसियतले बसिरहेको सोफाबाट उठेर तल अरूहरू बसेको ठाउँमा आएर बस्नुभयो ।
तर बिपीबाबूले यो कुरालाई मान्नुभएन । उहाँले सुवर्णबाबूलाई भुइँमा बसेको ठाउँबाट उठाएर पुनः पहिलेकै सोफामा लगेर बसाउनुभयो । र भन्नुभयो– तपाई हो अहिले काङ्ग्रेसको सभापति । मैले विधानतः कार्यबाहक दिएको हो । जबसम्म अर्को नेतृत्व आउँदैन, तबसम्म त्यो पदमा तपाईको हक छ ।
इतिहासमा कुर्सीको सवालमा यति उच्च आदर्श र सम्माजनक व्यवहार दर्शाउनसक्ने नेताहरूको पार्टीमा काङ्ग्रेसमा अहिले बिपीका सच्चा अनुयायी भनिनेहरूबाट पदका लागि जुन र्याल कढाइ भइरहेको छ, कन्टिर–बाबू छक्कमात्र होइन तीनछक्क परिरहेका छन् ।
koshionline
