कन्टिर–बाबूलाई अहिले गण्डकी प्रदेशको ताजा सरकारी निर्णयले केही सोच्न बाध्य बनाएको छ ।
चर्चित हिन्दी सिनेमा नायकमा मुख्यमन्त्री बनेका अमरिश पुरीजस्तै अनुहार भएका नेपाली काङ्ग्रेसका नेता कृष्णचन्द्र नेपाली पोखरेलसँग कन्टिर–बाबूको राम्रै सङ्गत छ । यिनको सादगी र सीधासाधा व्यवहारको कन्टिर–बाबू फ्यान नै हुन् ।
तीन पटकको प्रयासपछि यिनी तीन सत्ते शैलीमा गण्डकीमा मुख्यमन्त्री भए । मधेसतिर तीन पटकमा कुनै काममा पक्का सफलता पाइन्छ भन्ने लोकोक्ति छ– तीन सत्ते सत (सत्य–सत्य–सत्य १) । राम्रै भयो । नेपालीजीलाई अनेक बधाई ! तर संस्कृतमा एक भनाइ छ नि– प्रथमे ग्रासे मच्छिका पातः । अर्थात् पहिलो गाँसमै झिङ्गा ! अब खानु कि नखानु ?
गण्डकी प्रदेशको फस्ट इम्प्रेसन नै झुर जस्तो भयो । चाहना थियो मसिनो चामलको भात खाने तर पहिलो गाँसमै ढुङ्गा परो । नेपालीजी र उनको सरकारबाट जनहितमा महत्त्वपूर्ण काम हुने विश्वास सर्वसाधारणले गरेका थिए । तर यो डिङ्गो झिङ्गो असत्ति, यसलाई पनि अहिले नै आउनु थियो ।
कन्टिर–बाबूको मनमा केही प्रश्नहरू उठिरहेका छन्– के नेपालीजीको मन्त्रिमण्डलको पहिलो दिनको निर्णय नै सुविधामा केन्द्रित हुनुपर्ने थियो रु के त्यो निर्णय गर्न–गराउन गुरुङजी बाधक थिए, जसका कारण उनलाई हटाउनुपरेको थियो ?
नेपालीजीको पहिलो क्याबिनेटले पूर्व–मुख्यमन्त्री र संवैधानिक आयोगका पदाधिकारीलाई ‘सम्मान’ गर्ने भन्दै सेवा–सुविधा प्रदान गर्ने बारेको निर्णय भयो भन्ने चर्चाले अहिले व्यापक बजार पाएको छ । कन्टिर–बाबू पनि बजारभन्दा बाहेक छैनन् ।
यो अलग कुरा हो, जीवनभर लोकतन्त्र र जनताको अधिकारका लागि सङ्घर्षरत नेपालीजीले यस्तो निर्णयमा सहजै सहमति जनाए होलान् भनेर मान्न सकिन्न । अनुभवको कमीका कारण पनि यस्तो काम भएको हुन सक्ने सम्भावनालाई भने कन्टिर–बाबू इन्कार गर्न सक्दैनन् ।
ए बाबा, असल नियतले कानुन बनाउनु त नराम्रो होइन होला । रह्यो, सेवा सुविधा लिने नलिने कुरो । ‘स्वेच्छा’को पनि त केही अर्थ होला नि । यदि ‘सम्मान’का लागि भन्ने अर्थमा हो भने वर्तमान र निवर्तमानले आफूहरूले त्यस्तो सेवा–सुविधा नलिने घोषणा गरिदिए हुन्छ त । अहिलेसम्म कुनै सरकारी सुविधा नपाउँदा पनि पुगेकै थियो नेपालीजीलाई ?
सँगसँगै कन्टिर–बाबूको मनमा केही प्रश्नहरू उठिरहेका छन्– के नेपालीजीको मन्त्रिमण्डलको पहिलो दिनको निर्णय नै सुविधामा केन्द्रित हुनुपर्ने थियो ? के त्यो निर्णय गर्न–गराउन गुरुङजी बाधक थिए, जसका कारण उनलाई हटाउनुपरेको थियो ?
फस्ट इम्प्रेसन इज लास्ट इम्प्रेसन भन्छन् । नेपालीजीको मन्त्रिमण्डलको उल्लिखित निर्णयको असर जनतामा के पर्यो ? कमनिस्ट जनप्रतिनिधिहरू सुख–सुविधामा बढी केन्द्रित भए भनेर सार्वजनिक आलोचना र जनता कोरोना महामारीले हायलकायल भइरहेको बेला लोकतान्त्रिक पक्षधर जनप्रतिनिधिप्रति रहेको जन–भरोसाको अवस्था के भयो ? नेपालीजी र तिनका सल्लाहकारले अवश्य पनि स्वतन्त्र समीक्षा गर्लान् भन्ने कन्टिर–बाबूको अपेक्षा छ ।
यसबाहेक, नवनियुक्त मुख्यमन्त्रीले आफ्ना लागि पछि चाहिने ‘पेन्सन’ को बन्दोबस्त सुरुमै गर्न खोजे भन्ने केहीको टिप्पणी पनि छ । यो टिप्पणी सही हो भने कन्टिर–बाबू अहिले यतिमात्र भन्छन् – भक् बकलोल !
