कन्टिर–बाबू अतीतदेखि वर्तमानसम्मका साक्षी छन्– नीति तथा विधिमा विश्वास नगर्ने मानिस जब–जब अप्ठेरोमा पर्छ, ऊ कस्तै सम्झौता पनि गर्न तयार भएको हुन्छ । त्यस्ता व्यक्तिका लागि नीति, नैतिकता, आचार, मूल्य–मान्यता आदि सबै रद्दीको टोकरीमा मिल्किन्छन्, ओइलाएका मूलाको सागझैँ ।
कन्टिर–बाबूले नेपालमा बेलाबखत यस्ता सम्झौतापरस्त व्यक्ति र तिनले बेला–कुबेला सम्पादन गर्ने नचाहिँदो कार्यको टड्कारो दृश्य हेर्ने अवसर पाइरहन्छन् । उनले पछिल्लोपटक यस्तो अनुभव ओल्बाका सन्दर्भमा गरेका हुन् ।
ओल्बा पार्टी एकताको पासो फ्याँकेर आफू महान् बन्ने प्रयासमा रहेको देखाउन खोजिरहेका छन् । ‘माझ’हरूले पार्टी एकताका लागि २०७५ जेठ २ को अवस्थामा फर्कनुपर्ने कुरालाई धेरै अघिदेखि सर्तका रूपमा अघि सार्दै आएका हुन् । ऊबेला धोती च्यातिएर रूमाल बन्यो तर ओल्बाले ‘माझ’का कुरा मान्दै मानेनन् । उनले आफूलाई जे मन पर्यो त्यही गर्दै आइरहे, बाँकीलाई पुरानो थाङ्नामा सुताउने प्रयत्न गरिरहे ।
तर अचानक, लो सुन लो इन की बात ! पार्टी एकताका लागि पार्टीलाई २०७५ जेठ ३ अघिको अवस्थामा फर्काउन तयार रहेको भन्दै ओल्बाले हिजो ६ बुँदे सार्वजनिक ललिपप पो जारी गरे त ।
त्यसो त यो उनको पार्टीको आन्तरिक कुरा हो । उनी जे सुकै गरून्, माझहरूलाई मानुन् कि नमानुन् । कोही मन्त्री बनुन् कि नबनुन् कन्टिर–बाबूलाई बाल मतलब छैन । तर ओल्बाका कारणले, उनको पार्टीको किचलोका कारणले यो देश र जनता जब प्रभावित हुने अवस्था उत्पन्न हुन्छ भने कन्टिर–बाबूलाई मतलब नभएर भयो त ?
कन्टिर–बाबूले राजनीति जति बुझेका छन्, त्यस आधारमा भन्नुपर्दा ओल्बाको यो प्रस्ताव बडो चलख्याइँपूर्ण छ । प्रस्तावको बुँदा ४ मा एकताका लागि नयाँ सरकार गठनका सन्दर्भमा अदालतमा बुझाइएको हस्ताक्षर फिर्ता लिनुपर्ने उल्लेख । यो कुरा मान्ने कि नमान्ने माझहरू नै जानुन् तर कन्टिर–बाबूको प्रश्न छ– के यसो गर्दा माझहरूले भन्ने गरेको प्रतिगमन सच्चिन्छ ?
नेपालमा जारी राजनीतिका सन्दर्भमा कन्टिर–बाबूको थप जिज्ञासा छ– अहिलेसम्म माझहरूले निल्नुपरेको अपमानको तीतो घुट्कोको स्वाद ओल्बाको ६ बुँदे ललिपपले गुलियो हुन्छ ? दुई–दुई पटकको संसद् विघटनको (कु)कृत्य सच्चिन्छ ? कब्जामा परेका आयोग र अन्य सरकारी संस्थाहरू कब्जामुक्त हुन्छन् ? विदेशबाट राजदूतहरू फर्किन्छन् ? सबभन्दा महत्त्वपूर्ण कुरो, नेकपा (एमाले)प्रति गुमेको जनताको विश्वासको रक्षा हुन्छ ?
यसअघि सदनमा विश्वासको मतको निर्वाचन हुँदै गर्दा पनि ओल्बाले ‘माझभी’हरूलाई गरेको कारबाही फिर्ताको नाटकीय प्रस्तुति कन्टिर–बाबूले बिर्सिएका छैनन् । सदनको स्वार्थ–सिद्ध हुनासाथ झन् ठुलो कारबाही गरिएको घटना त जगजाहेरै छ ।
त्यसो त कन्टिर–बाबूलाई कारबाही र फुकावाको राजनीति र त्यसको रचना–गर्भबारे खासै थाहा छैन । थाहा हुनेले यसो टुच्च कन्टिर–बाबूलाई पनि टुच्काइ दिनुहोला !
