कहीँ नभएको जात्रा त्यो गाउँमा भनेको सुनेर कन्टिर–बाबूले एक जना बुजुर्गलाई सोधे– त्यो भनेको के हो बा ?
बुजुर्गले भने– त्यो गाउँमा जस्तो जात्रा हुन्छ, त्यस्तो जात्रा संसारमा अन्त कतै पनि हुँदैन भन्थे पुर्खाले, त्यही उखान सम्झेको नि !
उत्कट जिज्ञासु कन्टिर–बाबूले फेरि सोधे– अनि बेला न कुबेला यो उखान किन सम्झिनुभो त ?
‘अहिले नेपालको अवस्था देखेर नि !’ ती बुजुर्गले भने, ‘नेपालमा यतिबेला न विधि न व्यवस्था, न नीति न नैतिकता !’
कन्टिर–बाबूलाई पनि ती बुजुर्गको गुनासो सही लागेको छ । नेपालमा प्रधानमन्त्री र राष्ट्रपतिलाई जे मन लाग्यो, त्यही नै कानुन र संविधान बनेको छ हिजोआज । अझ भन्ने हो भने यिनीहरू आफूलाई संविधानभन्दा पनि माथि रहेको ठान्छन् र त्यसैअनुसारको व्यवहार गर्छन् ।
कन्टिर–बाबू मुर्मुरिँदै थप्छन्– सत्ता उन्माद, लहड र अध्यादेशका भरमा अधिनायक शैलीको शासनलाई सकेसम्म लम्ब्याउन चाहन्छन् उनीहरू ।
यसबेला ओल्बा र रापको पछिल्लो राजनीतिक कदम देखेर कन्टिर–बाबू यसअघि कहित्यै नपरेको छक्क परेका छन् । न नियम न कानुन, न विधि न प्रक्रिया, एकाएक दुवैको मिलेमतोमा संसद् छलेर नयाँ सरकार बनाउन दलहरूलक्षित फरमान जारी भएको छ । यसअघि दिएको समयभित्र ओल्बाले न विश्वासको मत लिनुपर्ने, न राजीनामा दिनुपर्ने ।
रापले ओल्बाको सिफारिसमा २१ घन्टाको समय दिएर नयाँ सरकारका लागि आह्वान गरेको कुरालाई कानुनका अधिकतर जानकारहरूले असंवैधानिक भनिसकेका छन्, जुन कुरासँग कन्टिर–बाबू पनि सहमत छन् ।
अरे यार, दुनियाँमा यस्तो पनि हुन्छ ? एउटा पद खाली नै नभइकन त्यसमा अर्को पदपूर्तिको कल्पना गर्न सकिन्छ ? बहालवाला प्रधानमन्त्रीले राजीनामा नै नदिइकन अर्को प्रधानमन्त्रीको खोजी गर्न मिल्छ ?
कन्टिर–बाबू भन्छन्– यो अरू केही होइन, शायद ओल्बा सबैलाई लोप्पा खुवाएर सत्ता र राजनीति आफू बाँचुञ्जेल कब्जा गरिराख्न चाहन्छन् । थाक्नुअघिसम्म आफ्नो मूर्खताको मियो वरपर अरूलाई घुमाइरहन चाहन्छन् ।
कन्टिर–बाबू वर्तमानको नेपाली राजनीति देखेर हिन्दी सायरीको एक पङ्क्ति सम्झिन्छन्– सरकती जाए सर से नकाब आहिस्ता–आहिस्ता ! नेपालको राजनीतिक सन्दर्भमा कन्टिर–बाबूको अपेक्षा थियो लोकतन्त्रको खोल ओडेकाहरूप्रति नेपाली जनताको आकर्षण बिस्तारै–बिस्तारै घट्दै जानेछ । तर यो पछिल्लो घटनाले सत्ताका मतियारहरूको मुकुन्डो एकैपटक उदाङ्गिएको कन्टिर–बाबूको ठहर छ ।
यस प्रकरणले ओल्बा र राप दुवै लोकतन्त्र र यो संविधानप्रति इमानदार नरहेको प्रष्ट भएको छ । कसैसँग न कुनै सल्लाह छ न परामर्श, बस मिलिभगतमा संविधान धुज्याउने (कु)कृत्य जारी छ ।
यता अर्को छ, जसपा । दूधको साक्षी बिरोलो बन्न तयार देखिँदै । तर कन्टिर–बाबूलाई लाग्छ– यदि यो बेलामा जसपसले ओल्बा–कृत्यलाई सघाउँछ भने उसको पनि मुखौटो निस्कने पक्का छ । हिजोका दिनमा जसपाले गरेको ओल्बाको विरोध देखावटीमात्र ठहरिनेछ ।
ओल्बा र रापको पछिल्लो मिलिभगतका बारेमा कन्टिर–बाबू धेरै कुरा बुझ्दैनन् । तर यहाँ कुनै ठूलै गोलमाल छ भन्ने उनलाई लागिरहेको छ । कन्टिर–बाबूलाई लागेको त्यो गोलमाल के हो ? त्यसको यकिन गर्न चाहिँ केही समय कुर्नुपर्ने हुन्छ । कम्तीमा साँझसम्म त कुरे न है !
koshionline
