२७ वर्ष पहिले आजकै दिन अर्थात् २०५० साल जेठ ३ गते नेपालमा के भएको थियो ? कन्टिर–बाबूमात्र होइन, सामान्य ज्ञानमा रुचि राख्ने प्रायः नेपालीलाई थाहा छ नेपालको इतिहासमा जेठ ३ गते के भएको थियो ।
आजकै दिन तत्कालीन नेपाल कम्युनिस्ट पार्टी माले (अहिले एमाले बनेको छ) का महासचिव मदन भण्डारी एवम् सङ्गठन विभाग प्रमुख जीवराज आश्रितलाई नारायणी नदीको भेलले बगाएको थियो ।
प्रत्यक्षतः जिप दुर्घटना भएर नारायणीमा अवसान भएका यी दुवै नेताको मृत्युलाई त्यसबेलादेखि अहिलेसम्म रहस्यमय मानिँदै आएको छ । माले हुँदै एमालेले आधिकारिक रूपमा हालसम्म यस दुर्घटनालाई हत्याको घटना मान्दै आएको छ ।
बीचमा यही नाममा अनेक आन्दोलन भए । कन्टिर–बाबू साक्षी छन्– यस्ता आन्दोलनका नाममा देशभरि तोडफोड भए । करोडौँको सार्वजनिक सम्पत्ति स्वाहा पारिए । छानबिनका लागि औपचारिक–अनौपचारिक आयोग तथा समितिहरू गठन भए तर परिणाम भयो के ? उही ढाकको तीन पात !
मदन भण्डारीले आफ्नालागि रोजेको नाम बर्बरिकको अनपेक्षित नियतिजस्तै उनको मृत्यु प्रकरण पनि रहस्यमयी भएर रहेको छ ।
दासढुङ्गा काण्डका नामले पनि परिचित यो घटना दुर्घटना नै हो कि सुनियोजित हत्या ? प्रश्न, प्रश्नमै सीमित छ आजसम्म । अनुसन्धानको पाइलो कहाँ पुगेर रोकियो कसैलाई थाहा हुन सकेको छैन ।
कन्टिर–बाबूलाई थाहा छ, नारायणीमा डुबेका वा डुबाइएका मदन भण्डारीको भूमिगत नाम बर्बरिक थियो । महाभारतका एक शक्तिशाली योद्धा बर्बरिकलाई कृष्णले मायामा पारेर टाउको काटेका थिए, जुन टाउको महाभारत युद्ध चलुञ्जेल एउटा रुखको हाँगोमा झुन्ड्याइएको थियो ।
यसरी टाउको झुन्ड्युञ्जेल बर्बरिकले महाभारत युद्धमा भएको हताहतीबारे केही थाहा पाएनन् । महाभारत युद्ध उनका लागि सधैँ रहस्यमयी घटना भएर रह्यो । भण्डारीले आफ्नालागि रोजेको नाम बर्बरिकको अनपेक्षित नियतिजस्तै उनको मृत्यु प्रकरण पनि रहस्यमयी भएर रहेको छ ।
यसबीचमा एउटा कुराचाहिँ जगजाहेर भएको कन्टिर–बाबूको निष्कर्ष छ– धेरै दिनसम्म माले–एमालेको राजनीति गर्ने र जनताका बीच भोट माग्ने माध्यम भने बनिरहेको छ यो घटना ।
तर पछिल्ला दिनहरूमा भने यस घटनालाई उचालेर राजनीति गर्नेहरूलाई जनताले चिन्न थालिसकेका छन् । कन्टिर–बाबू भन्छन– त्यस्तालाई जनताले नचिनुन् पनि कसरी ? प्रश्न त उठ्छ, जनताको बहुदलीय जनवादको प्रणेता लोकप्रिय नेता मदन भण्डारीको ऋण खाएर अहिलेका ‘सर्वहारा’हरूको यहाँसम्मको राजनीतिक–यात्रा तय भएको हो ।
यात्राका क्रममा पटकपटक सत्ताको सिढी उक्लेकाहरूमध्ये तीन पटक हाम्रा ओल्बा नै प्रधानमन्त्री भइसके । यसअघि यही पार्टीका नाममा मनमोहन, माकुने र झनाख पनि प्रधानमन्त्री भइसके । कन्टिर–बाबूलाई थाहा छ, एमालेको सहयोगमा धेरै पटक र एमालेकै नेतृत्वमा पाँच पटक सरकार बने ।
तर खोइ दासढुङ्गा काण्डका सवालमा कसले के लछारपाटो लाए ? कतिवटा माखो मारे ? कतिवटा सिन्का भाँचे ? घटनाको समयमा पार्टीले गठन गरेको छानबिन समितिको संयोजक ओल्बा नै थिए । उनको समितिले दोषी पत्ता लगाउने गुड्डी पनि हाँकेको थियो । तर संयोजक आफैँ तीन पटक प्रधानमन्त्री हुँदासमेत छानबिनलाई किन टुङ्गोमा पुर्याउन सकेनन् ? केले रोक्यो दोषीलाई सार्वजनिक गर्न, कारबाहीको दायरामा ल्याउन ?
त्यतिमात्र होइन, भण्डारी पत्नी विद्या पनि पटकपटक सत्तामा आइन्, देशको सर्वोच्च पदमा पनि आसिन भइन् । तर भण्डारीको हत्यारा कहाँ लुक्यो ? किन पत्ता लाग्दैन ? दासढुङ्गाा घटनाका साक्षी, ड्राइभर अमर लामा छानबिन चल्दाचल्दै बीचबजारमा गोली हानेर किन मारिए ? कन्टिर–बाबूका मनमा यस्ता प्रश्न उब्जिएका छन् यतिबेला ।
कन्टिर–बाबू थप प्रश्न गर्छन्– डाडु–पन्यु सबै आफ्नो हातमा भएको यो बेला पनि यस घटनाको अनुसन्धान नभए कहिले होला ? पार्टीले घटनाका बारेमा कहिले स्वेत–पत्र जारी गर्छ ?
कसैलाई थाहा भए कृपया कन्टिर–बाबूलाई जानकारी गराइदिनुहोला । हाललाई कन्टिर–बाबूका तर्फबाट भण्डारी र आश्रितको अमर आत्माप्रति भावपूर्ण श्रद्धाञ्जली !
