एजेन्सी – इंग्लिस प्रिमियर लिग फुटबलमा आर्सनल विजयी भएको छ । आइतबार राति भएको खेलमा आर्सनलले सेफिल्ड युनाइटेडलाई ३–० गोल अन्तरले पराजित गरेको हो ।
जितसँगै आर्सनल ४५ अंकका साथ तालिकाको नवौं स्थानमा छ भने पराजित भएको सेफिल्ड युनाइटेड १४ अंकका सात पुछारबाट शीर्ष स्थानमा छ ।
आर्सनललाई जिताउनका लागि एलेक्जेन्डर लाकाजेटीले २ गोल गर्दा गेब्रियल तियोदोरो मार्टिनेली सिल्वाले १ गोल थपेका थिए ।
सेफिल्डको मैदानमा पाहुना टोली आर्सनलका लागि ३३ औं मिनेटमा लाकाजेटीले गोल गर्दै अग्रता दिलाएका थिए ।
७१ औं मिनेटमा गेब्रियल सिल्वाले गोल गरेपछि आर्सनल २–० ले अघि बढेको थियो ।
त्यसपछि लाकाजेटीले व्यक्तिगत दोस्रो तथा टिमका लागि तेस्रो गोल ८५ औं मिनेटमा गर्दै ३–० को फराकिलो जित दर्ता गर्न सफल भए ।
