एजेन्सी – म्यानमारमा सेनाले ‘कु’ गरे पछि राजनीतिक संकट गहिरिँदै जान थालेको छ ।
केही दिन यता निषेधाज्ञाको उल्लघंन गर्दै हजारौं नागरिक सडकमा ओर्लिएपछि संकट थप गहिरिएको हो ।
प्रदर्शनमा उत्रिएकामाथी प्रहरीले बल प्रयोग संगै रबरका गोली समेत प्रहार गर्न थालेको छ । प्रहरीको यस्तो हर्कत लगत्तै प्रदर्शन हिंसात्मक बन्ने अनुमान गरिएको छ । प्रहरीले राधानी नेदिपअमा प्रदर्शनमा सहभागी भएकाहरुमाथि रबरको गोली प्रहार गरेको अन्तर्राष्ट्रिय सञ्चारमाध्यमले जनाएका छन् ।
हजारौँ नागरिक सेनाको निषेधाज्ञाको अवज्ञा गर्दै प्रदर्शनमा सहभागी हुन थालेका छन् । प्रदर्शनकारीमाथि प्रहरीले रबरको गोलीसँग पानीको फोहोरा तथा अश्रु ग्यास पनि प्रहार गरेको छ । प्रहरीको कुटाइबाट धेरै नै प्रदर्शनकारी घाइते भएका छन् ।
सेनाले समूहमा भेला हुन प्रतिबन्ध लगाएको छ भने रातिको समयमा कर्फ्यू लगाएको छ । सेनाले सत्ता हातमा लिएकै दिनबाट १ वर्षका लागि संकटकाल घोषणा गरेपछि त्यसको चौतर्फी विरोध भइरहेको छ ।
पेशाकर्मी, सर्वसाधारणसहित बौद्ध भिक्षुहरु पनि सेनाको कदमविरुद्ध प्रदर्शनमा उत्रिएका छन् । भिक्षुहरु पनि प्रदर्शनमा आएपछि सेना दवाबमा परेको छ ।
