बैतडी – बैतडीको विजयपुरमा माईतीमा आएकी छोरीलाई आफ्नै बुवाले गोली हानी हत्या गरेका छन् ।
जिल्लाको पुर्चौडी नगरपालिका १० विजयपुरस्थित माइती घरमा आएकी बेलमती महरा धामीलाई आफ्नै बुवा धनबहादुुर महराले गोली हानी हत्या गरेका हुन् । हत्या आरोपी धनबहादुर घटना लगत्तै फरार भएको बैतडी प्रहरीले जनाएको छ ।
धनबहादुर उनीकी श्रीमती बिच झगडा हुदा छुट्टाउन गएकी बेलमतीलाई बुवाले भरुवा बन्दुकले हानी हत्या गरेका स्थानियले बताए । शनिबार साँझ भएको घटनामा परी छोरी बेलमतीको घटना स्थलमा नै मृत्यु भएको थियो ।
हत्या पछि फरार रहेका धनबहादुरको खोजीकालागी ठुलो संख्यामा प्रहरी परिचालन गरिएको छ । घटना लगत्तै पुरघाटस्थित प्रहरी चौकीका असई नरेन्द्रसिंह बडाल नेतृत्वको प्रहरी टोली घटनास्थलतर्फ पुगेको छ । प्रहरीलाई चौकीबाट घटना स्थल पुग्न ५ घण्टा पैदल यात्रा तय गनुपरेको प्रहरी कार्यालयले जनाएको छ ।
मृत्तक महिलाको १ बर्षे काखे बालक रहेको प्रहरीले जानकारी दिएको छ । वैतडीमा १४ गते विद्यालयबाट फर्किने क्रममा दोगडाकेदार गाउँपालिका ७ की १७ वर्षीया भागरथी भट्ट घरनजिकैको जंगलमा विभत्स हत्या गरिएको अवस्थामा फेला परेकी थिइन् ।
