काठमाण्डौं – आज माघ १९ गते । नेपाली इतिहासमा आजको दिनलाई कालो दिनको रुपमा स्मरण गरिँदैछ ।
तत्कालीन राजा ज्ञानेन्द्र शाहले ‘राजनीतिक कू’ गरेको दिनको रुपमा माघ १९ लाई सम्झने गरिन्छ । नेपालको प्रजातन्त्रिक आन्दोलनमा कालो दिनको रुपमा आजको दिनलाई लिने गरिन्छ ।
२०६१ सालको माघ १९ गते राजा ज्ञानेन्द्रले प्रतिनिधिसभा विघटन गरी शाही सम्बोधनमार्फत शासनसत्ता आफ्नो नियन्त्रणमा लिन सफल भएका थिए ।
दरबार हत्याकाण्डलगत्तै राजा बनेका ज्ञानेन्द्रले मुलुकमा राजनीतिक अधिकार, मानवअधिकार तथा प्रेस स्वतन्त्रता कुण्ठित गरेर सबै प्रकारको सञ्चार माध्याममाथी नियन्त्रण जमाएका थिए ।
शाहले तत्कालीन प्रधानमन्त्री शेरबहादुर देउवालाई अपदस्थ गरी आफ्नै अध्यक्षतामा मन्त्रीमण्डल गठन गरेका थिए । उनले रेडियोमा समाचार रोक्ने देखी सञ्चार गृहहरुमा तत्कालीन शाही सेना परिचालन समेत गराइएका थिए ।
२०६२/०६३ को दोस्रो जनआन्दोलनले राजसंस्थाको अन्त्य गराई मुलुकमा गणतन्त्र स्थापना गराएको थियो । यही बीचमा माओवादी शान्ति प्रक्रियामा आएको थियो । जनआन्दोलनको जगमा पुनःस्थापित संसदले मुलुकबाट राजतन्त्र समाप्त गरी गणतन्त्र घोषणा गरेको थियो ।
त्यसपछि राजा ज्ञानेन्द्र नारायणहिटी दरबार छाडेर नार्गारजुन तिर लागेका थिए । तात्कालीन अवस्थामा टेलिभिजन सम्बोधनमार्फत् उनले ‘जनताको नासो जनतालाई नै फिर्ता गरिदिएको’ घोषणा समेत गरेका थिए ।
साँकेतिक तस्बिर
