काठमाण्डौं – नेपाली कांग्रेसको केन्द्रिय कार्य समितिको बैठक सम्पन्न भएको छ । बैठकले प्रतिनिधिसभा विघटनको विरोधमा थप आन्दोलनको कार्यक्रम गर्ने निर्णय समेत गरेको छ ।
समितिको मंगलबार बसेको बैठकले माघ १९ गते भ्रातृ संस्था, २४ गते शुभेच्छुक र ३० गते सबै जिल्लामा प्रदर्शन गर्ने निर्णय गरेको हो ।
माघ ३० गते उपत्यकाको ३ जिल्लाको कार्यक्रम भने एकीकृत रुपमा गर्ने भएको छ । बैठकअघि बसेको पदाधिकारी बैठकले उक्त प्रस्ताव तयार पारेको हो ।
पदाधिकारी बैठकअघि सभापति शेरबहादुर देउवा र वरिष्ठ नेता रामचन्द्र पौडेल पक्षबीच छुट्टाछुट्टै छलफल भएको थियो ।
यसअघि काँग्रेसले पुस १३ गते प्रतिनिधि निर्वाचन क्षेत्र, पुस २५ मा प्रदेश निर्वाचन क्षेत्र, माघ ३ गते पालिका स्तरीय र माघ ८ गते वडा स्तरीय विरोध प्रदर्शन गरेको थियो ।
