काठमाण्डौं – भारत सरकारले अनुदानमा उपलब्ध गराएको कोरोना भाइरसविरुद्धको खोप नेपाल सरकारलाई हस्तान्तरण गरिएको छ ।
भारतले उपलब्ध गराएको १० लाख डोज खोप एयर इन्डियाको विमानमार्फत आज विमानस्थलमा नै भारतीय राजदूत विनयमोहन क्वात्राले नेपाल सरकारलाई हस्तान्रण गरेको हो ।
भारतमा निर्मित कोभिसिल्ड खोप विमानस्थलमै नेपालको स्वास्थ्य मन्त्रालयका प्रतिनिधीलाई हस्तान्तरण गरेको थियो । प्राप्त खोप टेकुस्थित स्वास्थ्य सेवा विभागमा भण्डारण गरिएको छ । स्वास्थ्य सेवा विभागबाट प्रत्येक प्रदेशको भण्डारण केन्द्रमा खोप पठाइने ब्यव्स्था मिलाईएको स्वास्थ्य मन्त्रालयले जनाएको छ ।
पहिलो चरणमा खोप स्वास्थ्यकर्मी तथा अग्रपङ्क्तिमा खटिनेलाई उपलब्ध गराइने मन्त्रालयको तयारी छ । नेपालमा रहेका करिब १६ हजार खोप केन्द्रलाई परिचालित गरी खोप लगाउने व्यवस्था मिलाइएको छ । खोप आयात पछि पहिलो चरणमा जनसंख्याको ३ प्रतिशतलाई मात्र खोप लगाउने बताइएको छ ।
भारतबाट थप ३ चरणमा खोप ल्याउने नेपालको तयारी छ । कोभिसिल्ड सिरम इन्स्टिच्युट अफ इन्डियाले अक्सफोर्ड विश्वविद्यालय र बेलायती औषधि निर्माता कम्पनी एस्ट्रेजेनेकासँग मिलेर विकास गरेको खोप हो । सरकारले सिरम इन्स्टिच्युट अफ इन्डियाले उत्पादन गरिरहेको ‘कोभिसिल्ड’ नामक खोपका लागि आपतकालीन प्रयोग स्वीकृति प्रदान गरिसकेको छ ।
