सर्लाही – पूर्वपश्चिम लोकमार्गअन्तर्गत सर्लाही हरिवनमा भएको सवारी दुर्घटनामा २ जनाको ज्यान गएको छ भने १९ जना घाइते भएका छन् ।
पूर्वपश्चिम राजमार्गअन्तर्गत हरिवन नगरपालिका ४ स्थित सशस्त्र प्रहरी बेस क्याम्प नजिकै दाङबाट काँकडभिट्टातर्फ जादै गरेको यात्रुबस दुर्घटना हुँदा घटनास्थलमा १ जना र उपचारका लागि वीरगञ्ज लैजाँदै गर्दा बाटोमा १ जनाको मृत्यु गएको जिल्ला प्रहरी कार्यालय सर्लाहीले पुष्टी गरेको छ ।
मृत्यु हुनेमा दाङ राप्ती गाउँपालिका ५ का ३६ वर्षीया राजकुमारी चौधरी र दाङ राप्तीका २३ वर्षीया रीता चौधरी भएको इलाका प्रहरी कार्यालय लालबन्दीले जनाएको छ ।
ना. ५ ख ४४८८ नम्बरको यात्रुबस अनियन्त्रित भई रोडदेखि १० मिटर तल खसेको प्रहरीले जनाएको छ । बसमा ३० जना रहेका थिए ।
घाईते मध्ये चालकसहित ५ जनाको अवस्था गम्भीर रहेको छ । उनीहरूलाई न्युरो अस्पताल वीरगञ्ज उपचारका लागि पठाइएको छ । अन्य ३ जनाको भने नमूना अस्पताल हरिवनमा उपचार भइरहेको छ । ९ जनाको अवस्था सामान्य रहेको प्रहरीले जनाएको छ ।
बस बिहिबार बिहान करिब ४ः५० बजे दुर्घटनामा परेको थियो ।
