चितवन – पूर्वी चितवनमा गए राति बस र ट्रक एकापसमा ठक्कर खाँदा बस चालकको मृत्यु भएको छ ।
राप्ती नगरपालिका–५ कालिका पेट्रोलपम्प नजिक भएको उत्त घटनामा परी मृत्यु हुनेमा बस चालक खोटाङका ४५ वर्षीय चन्द्रबहादुर श्रेष्ठ रहेको जिल्ला प्रहरी कार्यालय चितवनले पुष्टी गरेको हो ।
काठमाण्डौँबाट काँकडभिट्टातर्फ गइरहेको ना. ७ ख २१११ नं.को बस र विपरीत दिशाबाट आइरहेको ना. ६ ख ४२८१ नं.को ट्रक एकापसमा ठक्कर खाएको प्रहरीले जानकारी दिएको हो । ठक्करबाट घाइते भएका बसका चालक श्रेष्ठको उपचारका लागि अस्पताल ल्याउँदै गर्दा बाटोमा नै मृत्यु भएको हो ।
राति ११ बजे भएको दुर्घटनामा परी बसका सह–चालक रौतहट चपुर ४ बस्ने ४९ वर्षीय विनोद शर्मा सङ्ग्रौला र ट्रकका सहचालक बाराको जितपुर सिमरा उपमहानगरपालिका २३ का सुनिलकुमार साह घाइते भएका छन् ।
घाइतेहरुको पुरानो मेडिकल कलेजमा उपचार भइरहेको छ । उनीहरुको अवस्था सामान्य रहेको र बसमा सवार १५ जना सकुशल रहेको प्रहरीले जनाएको छ । ठक्कर खाने ट्रकका चालकलाई इलाका प्रहरी कार्यालय भण्डाराले नियन्त्रणमा लिएको छ ।
