घुम्नका लागि सौखिन अभिनेत्री हुन्, प्रियंका कार्की । नेपालका विभिन्न ठाउँसँगै उनले संसारका धेरै देशको भ्रमण गरिसकेकी छन् । विवाहभन्दा अगाडि श्रीमान् आयुष्मान देशराज जोशीको साथमा स्विजरल्याण्डको भ्रमण गरेकी उनी विवाहपछि भने घरभित्रै सीमित छिन् । किनकि, उनी बैबाहिक जीवनमा बाँधिएको केही हप्तामा कोरोना भाइरसका कारण देश लकडाउन भयो ।
विवाह गर्नुभन्दा अगाडि प्रियंका र आयुष्मानले काठमाडौंको भैंसेपाटीमा नयाँ घर किनेका थिए । लकडाउनपछि उनीहरुले त्यहीँ आफ्नो दैनिकी विताइरहेका छन् । कोरोनाका कारण जारी बन्दाबन्दीमा धेरै कलाकारले बोलीमा नियन्त्रण गर्न नसक्दा विवादमा तानिए । प्रियंकाले भने भान्सा छिरेर विभिन्न खानाका परिकार बनाउन सिकिन् र भिडियोमार्फत् दर्शकलाई पनि सिकाइन् ।
लकडाउन खुकुलो भएपछि केही म्यूजिक भिडियोमा काम गरेकी प्रियंका निषेधाज्ञापछि घरको चारकुनामा सीमित छिन् । देशभर कोरोना संक्रमितको संख्या बढिरहेका कारण उनी तत्काल स्वास्थ्यलाई जोखिममा पारेर काममा फर्किन चाहेकी छैनन् । अहिले उनी आफ्नो नाममा खोलेको यूट्युब च्यानलका लागि भान्सामा विभिन्न परिकार बनाएर त्यसको भिडियो बनाउन व्यस्त छिन् ।
कोरोना कहरले सात महिनादेखि घरभित्र सीमित हुनु पर्दा प्रियंका घुमफिरमा निस्कन नपाएर निकै छट्पटिएकी छन् । उनले आइतवार आफ्नो सामाजिक सञ्जाल इन्स्टाग्राममा पेरिस घुम्दाको एक तस्विर साझेदार गर्दै ‘आई मिस ट्राभलिङ’ भनेर लेखेकी छन् । उनलाई काम फर्किने आतुरताभन्दा घुम्न नपाएर कुन हदसम्म छट्पटी भएको छ भन्ने कुरा यसबाट पनि बुझ्न सकिन्छ ।
