अभिनेत्री पूजा शर्माको शीर्ष भूमिका रहेको फिल्म ‘म यस्तो गीत गाउँछु २’ कोरोना भाइरसका कारणले गरिएको लकडाउनपछि रिलिज हुन पाएको छैन । अब सिनेमा हलमा फिल्म कहिले रिलिज हुन्छ भन्ने टुंगो छैन । उक्त फिल्ममा पूजाको जोडी पल शाहसँग बाँधिएको छ । यस्तै केही समयअघि पूजा आफूले दिएको एक अन्तर्वार्ताका कारण विवादमा परिन् ।
नेपालमा कति जिल्ला र प्रदेश छन् भन्ने सामान्य प्रश्नको जवाफ पनि दिन नसकेपछि उनको चौतर्फी आलोचना भयो । यो घटनाले उनी निकै तनावमा समेत परिन् । पछिल्लो समय भने उनी खुशी हुने प्रयासमा छिन् । आफ्ना कमजोरी सुधार्ने प्रयासमा छिन् ।
यो लकडाउन यता केही म्युजिक भिडियोमा अभिनय गरेकी पूजा सामाजिक सञ्जालमा पनि उत्तिकै सक्रिय रहन्छिन् । उनले इन्स्टाग्राममा नयाँ तस्वीरहरु शेयर गरेकी छिन् । ती तस्वीरमा पूजाको सुन्दरता झल्केको छ । तस्वीर शेयर गर्दै उनले लेखेकी छिन् – आफ्नो आत्मालाई खुशी हुन समय दिनुहोस् । प्रस्तुत तस्वीरहरु उनको ईन्स्टा एकाउन्टबाट लिइएको हो ।
