बार्सिलोनाका व्यवसायिक फुटबलर लियोनल मेसी सन् २०२० मा सर्वाधिक कमाउने खेलाडी भएका छन् । उनले १२ करोड ६० लाख डलर कमाइ गरेका छन् । त्यसभन्दा अघि युभेन्टसका क्रिस्टियानो रोनाल्डो सर्वाधिक कमाउने खेलाडी रहेका थिए । यो वर्ष उनी ११ करोड ७० लाख डलर कमाइसँगै दोस्रो स्थानमा छन् ।
संसारका धनीहरुको विवरण राख्ने म्यागेजिन फोर्ब्सका अनुसार बार्सिलोनाका मेस्सीले युभेन्टसका क्रिष्टियानो रोनाल्डोलाई पछि पार्दै शीर्ष स्थान हत्याएका हुन् । यी दुई फुटबलरबीच सबैजसो विषयमा प्रतिष्पर्धा भइरहँदा धन संकलनमा पनि उछिनाउछिन हुने गरेको छ ।
फोर्ब्सका अनुसार मेस्सीको अनुमानित वार्षिक आय १२६ मिलियन अमेरिकी डलर छ जबकी रोनाल्डोको ११७ मिलियन डलर रहेको छ । तेस्रो स्थानमा रहेको पेरिस सेन्ट–जर्मेन (पिएसजी) का नेइमारले यी दुईलाई पछ्याइरहेका छन् । उनको वार्षिक आय ९६ मिलियन डलर रहेको उक्त पत्रिकाको अनलाइन संस्करणमा उल्लेख छ ।
सन् २०१९ मा पनि यी तीनै जना शीर्ष स्थानको यही सूचीमा रहेका थिए । तर यस पटक चौथो स्थान भने तीन स्थानमाथि उक्लिएर पिएसजीकै केलियन एमबाप्पेले हत्याएका छन् । उनी ४२ मिलियनसहित चौथो स्थानमा रहँदा लिभरपुलका मोहम्मद सालहले ३७ मिलियनसहित पाँचौँ स्थान ओगटेका छन् ।
छैटौँ स्थानका म्यानचेस्टर युनाइटेडका पउल पोग्बाको ३४ मिलियन र सातौँ स्थानका बार्सिलोनाका एन्टोनी ग्रिजम्यानको ३३ मिलियन, आठौँ स्थानका रियल मड्रिडका ग्यारेथ बेलको २९ मिलियन, नवौँ स्थानका बार्यन म्युनिखका रोबर्ट लेवान्डोस्कीको २८ मिलियन र दशौँ स्थानका म्यानचेस्टर युनाइटेडका डेविड डी जियाको २७ मिलियन डलर वार्षिक आय रहेको फोर्ब्सले जनाएको छ ।
