इटालियन क्लब युभेन्टसले बार्सिलोनाका स्ट्राइकर लुइस स्वारेजलाई भित्र्याउने योजना बनाएको बताइएको छ ।
नवनियुक्त डच प्रशिक्षक रोनाल्ड कोइम्यानका कारण क्लब छोड्ने मनसायमा पुगेका उरुग्वेका स्टार स्वारेजलाई भित्र्याउने युभेन्टसले मनसाय बनाएको ‘गोल डटकम’ ले जनाएको छ ।
बार्सिलोनाका लागि धेरै गोल गर्ने खेलाडीको सूचिमा तेस्रो स्थानमा रहेका स्वारेजले कोइम्यानका कारण क्लब छोड्ने मनसाय बनाएको बताइएको छ ।
बार्सिलोनाका पूर्वखेलाडीसमेत रहेका कोइम्यानले फोन गरेर ६० सेकेण्ड गरेको कुराले स्वारेज निकै विचल्लित भएको बताइएको छ । कोइम्यानले स्वारेजलाई आफ्नो योजनामा नरहेको बताउँदै तत्काल विकल्प खोज्न भनेका थिए ।
स्वारेजले कोइम्यानको मुखबाट निस्किएका शब्दले आफू निकै दुखित भएको बताउँदै विकल्पको खोजीमा लागेको पनि बताएका छन् ।
खबरका अनुसार स्वारेजलाई सिरी ‘ए’ क्लब युभेन्टसले गोन्जालो हिगुइनको स्थानमा ल्याउन चाहेको हो ।
हिगुइनले यसै सिजन युभेन्टस छोडेका हुन् । क्लबका प्रशिक्षक आन्द्रे पिर्लो हिगुइनको बहिर्गमनपछि ट्राइकरको खोजीमा छन् ।
३३ वर्षीय स्वारेजले पनि युभेन्टसलाई विकल्पका रूपमा हेरेका छन् । त्यसबाहेक उनले इन्टर मिलानसँग नयाँ सम्झौताको कुरा सुरु गरेका छन् ।
यस्तै उनको यात्रा अमेरिकी मेजर लिग सकरतिर लम्किन सक्ने जनाइएको छ । डेभिड बेकह्यामको क्लब इन्टर मियामी जाने चर्चामा रहेका उनीमाथ डच क्लब आयाक्सको पनि नजर छ ।
