गोरखा समाचारदाता
काठमाण्डौं – नोबल कोरोना भाइरस (कोभिड–१९) का कारण विश्वभर संक्रमितको संख्या १ करोड ५० लाख नजिक पुगेको छ ।
सोमबार बिहान सम्म विश्वभरी कोरोना संक्रमितको संख्या १ करोड ४६ लाख ४४ हजार ३६० जना पुगेको छ । संक्रमित मध्ये अहिले सम्म ६ लाख ८ हजार ९११ जनाले ज्यान गुमाइसकेका छन् ।
कोरोना भाइरसका कारण सबैभन्दा धेरै अमेरिकामा प्रभावित भएको छ । अमेरिकमा मात्रै ३८ लाख ९८ हजार ५५० जना संक्रमित भई सकेको छ । संक्रमणबाट त्यस देशमा अहिले सम्म १ लाख ४३ हजार २८९ जनाको ज्यान गईसकेको छ ।
अमेरिका पछि दोस्रो स्थानमा रहेको ब्राजिलमा २० लाख ९९ हजार ८९६ जना संक्रमित भएका छन् । त्यहाँ ७९ हजार ५३३ जनाले ज्यान गुमाइसकेका छन् ।
ब्राजिल पछि नेपालको छिमेकी राष्ट्र भारत तेस्रो स्थानमा रहेको छ । जहाँ ११ लाख १८ हजार १०७ जना संक्रमित फेला परिसकेको छ । भारतमा अहिले सम्म २७ हजार ५०३ जनाले ज्यान गुमाई सकेको छ ।
संक्रमणबाट बेलायतमा ४५ हजार ३०० जना, मेक्सिकोमा ३९ हजार १८४ जना, ईटालीमा ३५ हजार ४५ जनाले ज्यान गुमाएको विश्व स्वास्थ्य संगठनले जनाएको छ ।
संक्रमितमध्ये विश्वभर ६० प्रतिशतभन्दा बढी निको भएर आफ्नो घर फर्किएका छन् । निको हुनेको संख्या ८७ लाख ३५ हजार २८९ जना रहेको छ ।