रियल मड्रिडका स्टार खेलाडी डेनी कार्भजलले क्लब ला लिगाको उपाधिका लागि आतुर रहेको बताएका छन् । बिहीबार गेटाफेविरुद्धको खेल जितेपछि पत्रकारसँको संक्षिप्त कुराकानीमा कार्भजलले उपाधिका लागि क्लब अगाडि बढिरहेको जनाएका हुन् ।
उपाधि दाबेदार मानिएको क्लब रियल मड्रिडले आफ्नो २२औं जित दर्ता गरेको थियो । बिहीबार राति रियलले गेटाफेविरुद्ध १–० गोलको कठिन जित निकालेको हो ।
यस जितसँगै रियलले दोस्रो स्थानको बार्सिलोनासँग स्पष्ट ४ अंकको अग्रता लिएको छ । शीर्ष स्थानको रियलले ७४ अंक बनाएको छ भने दोस्रो स्थानको बार्सिलोनासँग ७० अंक रहेको छ ।
रियलले कोरोना महामारीका कारण स्थगन भइ पुनः सुचारु भएको ला लिगामा लगातार छ खेलमा जित निकालेको छ । बार्सिलोनाले भने छमध्ये तीन खेलमा बराबरी र तीन खेलमा जित निकालेको छ ।
खेलपछि बोल्दै कार्भजलले भने, ‘हामीले जितसँगै स्पष्ट चार अंकको अग्रता बनायौं । उपाधि जित्नका लागि हामी आफूमा निर्भर छौं । हामी उपाधिका लागि आतुर छौं, हामी उपाधितर्फ अगाडि बढिरहेका छौं ।’
‘गेटाफेले धेरै राम्रो खेल खेलेको थियो । हामीले बार्सिलोनाको बराबरीको फाइदा उठायौं । यो खेल फाइनल जस्तै थियो । गेटाफेले हामीलाई कठिन बनाइदिएको थियो । हामी अब गम्भीर हुन जरुरी छ, र हाम्रो एकता देखाउनु जरुरी छ । अब आइतबार हामीसँग एक धेरै कठिन भिडन्त छ ।’ उनले भने ।