जर्मनीका आक्रामक मिडफिल्डर एवं प्रिमियर लिग क्लब म्यानचेस्टर सिटीका स्टार लेरोय सानेले सिटी छाड्ने भएका छन्। यसअघि सानेलाई क्लबमै राख्ने सोच बनाएको सिटीले अहिले जर्मन क्लब बायर्न म्युनिखलाई बेच्न सहमति जनाएको छ।
म्यानचेस्टर सिटीले सानेलाई ५८.८ मिलियन पाउन्डमा बेच्ने निश्चित गरेको अन्तर्राष्ट्रिय सञ्चार माध्यमले जनाएका छन्। यसअघि कोरोना भाइरसको महामारीका कारण उचित मूल्य नपाउने भन्दै सिटी साने बेच्न हच्किएको थियो। २४ वर्षीय सानेको सिटीसँगको सम्झौता अर्को सिजनसम्म रहेको छ। सिटीले सानेलाई क्लबमा राख्ने र सम्झौता नवीकरण गर्ने सोच पनि बनाएको थियो। तर, सानेले सिटीको नवीकरण प्रस्तावलाई अस्वीकार गरेका छन्।
सिटीले सानेलाई वार्षिक २० मिलियन पाउन्ड तलब दिन अस्वीकार गरेको र सानेको मागमा बायर्न सहमत भएकाले उनी जर्मन नै फर्कने पक्का भएको बताइएको छ। साने सन् २०१६ मा जर्मन क्लब साल्केबाटै म्यानचेस्टर सिटी आएका थिए। त्यतिबेला उनलाई सिटीले ३७ मिलियन पाउन्डमा खर्च गरेको थियो। म्यानचेस्टर सिटीमा उत्कृष्ट प्रदर्शन गरिरहेका सानेले टोलीलाई दुई पटक प्रिमियर लिग उपाधि जिताउन महŒवपूर्ण भूमिका निभाएका थिए।
अघिल्लो सिजन म्यानचेस्टर सिटीले तीनवटा उपाधि जित्दा साने महŒवपूर्ण खेलाडी थिए। यस सिजन घाइते रहेका साने जम्न सकेका छैनन्। चोटका कारण मैदान बाहिर रहेका साने कोरोनापछि मैदान फर्किएका छन्। सानेले म्यानचेस्टर सिटीबाट एक सय ९२ खेल खेल्दै ५२ गोल गरेका छन्। सन् २०१५ देखि जर्मन राष्ट्रिय टोलीका महŒवपूर्ण खेलाडी रहेका उनले देशका लागि २१ खेल खेल्दै पाँच गोल गरेका छन्।