गोरखा समाचारदाता
गोरखा – गोरखा नगरपालिका भित्र नगर यातायात सञ्चालन हुने भएको छ ।
पृथ्वीराजमार्ग बस सञ्चालक समिति गोरखाले गोरखा नगरपालिकाको अनुमतीमा मंसिर ५ गतेबाट बजार क्षेत्रका विभिन्न ठाउँमा यातायात सञ्चालन गर्न लागेको हो ।
‘नगरबासीको सुबिधाका लागि हामीले नगरबस सेवा सुरु गर्न लागेका हौं’ गोरखा नगरपालिकाकी प्रमुख प्रशासकिय अधिकृत कृष्णकुमारी श्रेष्ठले भनिन् ‘वडा कार्यालय र नगरपालिकासम्म आउने÷जाने सेवाग्राही र कर्मचारीलाई सजिलो होस् भन्ने हाम्रो मुख्य जोड हो, यसबाट नगरबासी सबैले लाभ लिन सक्नुहुनेछ ।’ अहिले विभिन्न ११ वटा रुटमा बस चल्ने बताइएको छ ।
घलाङ नारेश्वर हुँदै गोरखा नगरपालिका कार्यालय, छोपथोकबाट नगरपालिका कार्यालय, नगरपालिकाबाट फिनाम ताप्ले छापथोक, छेवेटारबाट नगरपालिका कार्यालय, गोरखकाली दरबार सतिपिल पस्लाङ रोटेपानी हुँदै नगरपालिका कार्यालय घुम्ती सेवा, देउरालीबाट नगरपालिका कार्यालय र पिपलथोक पन्थेस्वाँरा रानीवन हुँदै नगरपालिका कार्यालय घुम्ती सेवा गरी रुट निर्धारण गरिएको छ ।
यसैगरी मान्द्रेढुङ्गा गोरखा क्याम्पस खिरेपानी हुँदै नगरपालिका कार्यालय खुम्ती सेवा, ढुङ्गागाडे आहाले कट्टेलडाँडा हुँदै नगरपालिका कार्यालय, गोरखा बजार परिक्रमा घुम्ती सेवा, नगरपालिकाबाट बसपार्क नारेश्वर मेलबिसौना डेरागाउँ फिनाम हुँदै नगरपालिका घुम्ती सेवा गरी विभिन्न ११ रुटमा गाडी सञ्चालन गर्न लागिएको हो ।
‘अहिले सुरुमा ८/१० वटा बस चल्छन्, तिनै बसलाई आलोपालो मिलाएर सबै तिर पठाउँछौ’ पृथ्वी राजमार्ग बस सञ्चालक समितिका क्षेत्रिय सदस्य विपिनचन्द्र ढकालले भने ‘यात्रुको चाप र आवश्यकतालाई हेरेर थप्दै लैजाने योजना छ ।’ नेपाल सरकारको प्रचलित मापदण्डको आधारमा भाडादर कायम गर्ने समेत सहमती गरिएको छ । गोरखा सदरमुकाममा नगरबस सञ्चालन नहुँदा नगरबासीलाई समस्या भएको छ ।
