गोरखा समाचारदाता
काठमाडौँ – अरब सागरको हावाको प्रभावका कारण नेपालमा केही दिन बर्षा सहित हिमपात हुने संभावना देखिएको छ ।
अरब सागरमा उत्पन्न शक्तिशाली चक्रवातका कारण नेपालमा केही दिन वर्षात्सँगै हिमपात हुने मौसम पूर्वानुमान महाशाखाले जानकारी दिएको हो।
मौसमविद् शान्ति कँडेलका अनुसार अरब सागरमा उत्पन्न शक्तिशाली चक्रवातका कारण नेपाल मध्य पहाडी भेगमा वर्षा र उच्च हिमाली भेगमा हिमपात हुने छ । उनका अनुसार बुधबार रातिदेखि मध्य र पूर्वी पहाडी भूभागसँगै पश्चिमी भेगमा वर्षा हुने अनुमान गरीएको हो । पश्चिमी वायुको प्रभाव बलियो हुँदा पश्चिमतिर रहेको उच्च हिमाली भेगमा रातिदेखि नै हिमपात हुने अनुमान महाशाखाले गरेको छ ।
आगामी तीन दिन यसै अवस्थामा मौसम सक्रिय हुने छ । अरबको आँधीको असर भारतको दिल्लीमा परेसँगै त्यहाँ वर्षात् सुरु भएको छ । दिल्लीमा वर्षा भएपछि त्यहाँको प्रदूषण कम हुने अनुमान गरिएको छ ।
हिउँदको सुरुआतसँगै उच्च हिमाली भेगमा हिमपात सुरु हुने मौसम भएकाले सतर्क रहन महाशाखाले भनेको छ । महाशाखाले उच्च हिमाली भेगमा नजान समेत आग्रह गरेको छ ।