गोरखा समाचारदाता
काठमाडौं – पूर्व सभामुख कृण्णबहादुर महरालाई कारागार चलान गरीएको छ । संसद सचिवालयकी कर्मचारी रोशनी शाहीलाई बलात्कार प्रयास गरेको आरोपमा पूर्वसभामुख महरालाई पुर्पक्षका लागि कारागार चलान गर्ने आदेश भएको हो ।
जिल्ला अदालत काठमाडौंमा २ दिनसम्म चलेको बहसपछि अदालतले महरालाई कारागार चलान गर्ने आदेश दिएको हो । घटना विवरण कागजात, जाहेरी दरखास्त, मौकामा कागज गर्नेहरुको बयान र तत्काल प्राप्त प्रमाणको आधारमा महरा कसूरदार होइन भन्न नसकिने भएकाले उनलाई पुर्पक्षका लागि थुनामा पठाउने आदेश भएको अदालतका श्रेस्तेदार आनन्द श्रेष्ठले बताए ।
न्यायाधीश सुदर्शनराज पाण्डेको इजलासमा जिल्ला सरकारी वकिल तथा सहन्यायाधीवक्ता चन्द्रकान्त खनाल, जिल्ला न्यायाधीवक्ता उमाकान्त पौडेल र हरि रेग्मी तथा सहजिल्ला न्यायाधीवक्ता सृजना ढकालले पीडितको पक्षबाट बहस गरेका थिए ।
पूर्वसभामुख महराका पक्षबाट वरिष्ठ अधिवक्ता लव मैनालीका साथै पूर्वमहान्यायाधीवक्ता रमण श्रेष्ठलगायतले बहस गरेका थिए ।
‘मुलुकी अपराध संहिता २०७४ को दफा ३८ को देहाय (घ) बमोजिम कसूरको गम्भीरता बढाउने अवस्थाको भएको’ भन्दै जबरजस्ती करणी उद्योगमा हुने सजायको डेढी सजाय हुन सरकारी वकिलको माग दाबी रहेको छ।
१९ वर्षभन्दा माथिकी महिलामाथि जबरजस्ती करणी (बलात्कार) भए कसूरदारले ७ देखि १० वर्षसम्म कैद सजाय पाउँछन् । जबरजस्ती करणी उद्योग (बलात्कार प्रयास) मा भने त्यसको आधा सजाय हुन्छ । अर्थात् साँढे ३ देखि साँढे ५ वर्षसम्मको सजाय हुन्छ । त्यसमा डेढी कैद सजाय जोडेर झण्डै साँढे छ देखि साँढे ७ वर्षसम्मको कैद सजाय माग गरिएको हो ।
महरालाई अदालतले डिल्लीबजार कारागार चलान गर्न आदेश दिइएको छ ।