मोहसिन अलि मियाँ
गोरखा – अघिल्ला बर्षहरुमा झै यस बर्षपनि चाडवाडको मौका छोपेर नियम मिच्दै गोरखामा सवारी हाक्नेको संख्या उल्लेख्य रह्यो । अन्य समयमा भन्दा चाडवाडका समयमा निजी तथा सार्वजानिक सवारी चालकले ट्राफिक नियम विपरित साधन हाक्ने परिपाटी यो दशैंमा पनि कम हुन सकेन ।
जिल्ला ट्राफिक कार्यालय गोरखाले केहि समययता आफ्नो सकृयता बढाउदै सचेतनाका कार्यक्रमहरु सञ्चालन गरेपनि दशैका समयमा भने त्यसको प्रभाव खासै परेन । कार्यालयसंग रहेको पछिल्लो १५ दिनको तथ्यांक हेर्ने हो भने पनि नियम मिच्ने सवारी साधन उल्लेख्य रहेको देखाउछ ।
दशैमा मात्रै गोरखामा ५ सय ३२ सवारी साधन कारवाहीमा परेका छन् । ट्राफिक नियम पालना नगरेको भन्दै जिल्ला ट्राफिक कार्यालय गोरखाले ति सवारीका साधनलाई कारबाही गर्दै जरिवाना गरेको बताएको छ ।
दशैको घटस्थापनाका दिनदेखि २८ गतेसम्म जिल्लाका बिभिन्न स्थानमा चेकजाँचका क्रममा सो संख्याका सवारी साधनलाई कारबाही गरिएको ट्राफिक टिका शर्माले बताए । जसबाट यस अवधीमा मात्रै ३ लाख ७० हजार ५ सय रुपैया राजश्व संलकन भएको छ । ‘अरु बेला भन्दा चाडवाडका समयमा नियम उल्लंघन गर्नेको संख्या अलि बढी नै हुन्छ’ शर्माले भने ।
निमय उल्लंघन गर्नेहरुमध्ये सबैभन्दा बढी मोटरसाइकल छन् । १५ दिनको अन्तरालमा जिल्लामा १ सय ७६ मोटरसाइकल ट्राफिकको कारवाहीमा पर्दा १ लाख २१ हजार ५ सय रुपैया जरिवाना असुल गरिएको छ ।
त्यस्तै १ सय ३५ जिप, कार र भ्यान ट्राफिक निमय विपरित सञ्चालन भएका थिए । जसबाट १ लाख ३ हजार रुपैया जरिवाना संकलन भएको बताइएको छ । यसैगरी ९० वटा ट्रकका चालकलाई कारबाही गर्दा ६४ हजार राजश्व उठेको छ भने ६७ वटा ट्याक्टरबाट ४४ हजार ५ सय रुपैया राजश्व असुल भएको ट्राफिक शर्माको भनाई छ ।
त्यस्तै ६४ वटा बस समेत ट्राफिकको कारबाहीमा परेका छन् । बसबाट ३७ हजार ५ सय रुपैया जरिवाना संकलन भएको छ ।
यसैगरी गोरखाका बिभिन्न स्थानमा मादक पदार्थ सेवन गरी सवारी हाक्ने ८ जना कारबाहीका परेका छन् । उनिहरुबाट ८ हजार रुपैया जरिवाना लिइएको कार्यालयको भनाई छ ।
कार्यालयका अनुसार यस बर्ष जिल्ला भित्रने सवारी साधनको संख्यामा बृद्धि हुदा कारबाहीमा पर्नेको संख्या समेत बढेको हो । ‘यो बर्ष गत बर्षको तुलनामा अलि बढी नै सवारी जिल्ला भित्रिएको हो’ ट्राफिक शर्माले भने ‘सवारी बढेपछि कारबाहीमा पर्ने संख्या बढ्नु पनि स्वभाविक नै हो ।’ हालसम्म जिल्लाका कुनै पनि स्थानबाट सवारीले बढी भाडा लिएको भन्दै कार्यालयमा उजुरी भने नपरेको उनको दावी छ ।
दशैंमा ट्राफिकले आहलेको शसस्त्र क्याम्प, हरमटारी, टक्सार, बाह्र किलो, मझुवा देउराली लगायतका स्थानमा चेकजाँच गरेको थियो ।