गोरखा समाचारदाता
गोरखा – बडादशैंको सातौं दिन अर्थात फुलपाती । सप्तमी तिथिमा पर्ने यस दिन हिन्दु धर्मावलम्बीहरुको महान चाड बडादशैंको महत्वपूर्ण दिन पनि हो ।
घटस्थापनाका दिन राखिएको जमरा र फुलपातीलाई आज दशैंघरमा भित्राउने चलन पृुरानै हो। कालरात्री देवीको पूजा अर्चना गरिनुका साथै हिन्दु नेपालीका घरघरमा फुलपाती भित्र्याईन्छ ।
दसैंघरमा उखु, केरा, बेलपत्र, दारिम, अशोक, धान र जयन्तीको बोटका साथै नयाँ फलफुलका पालुवालाई शुभ साईतका रुपमा फुलपाती मानेर भित्राउने गरीन्छ ।
संघिय राजधानी काठमाडौको वसन्तपुरमा भने गोरखा दरबारको दसैंघरबाट ल्याइएको फुलपाती परम्परा अनुसार नै आजै भित्राईन्छ ।
आजै गोरखा दरबारबाट काठमाडौंको जमलसम्म लगिएको फूलपातीलाई नेपाली सेना तथा प्रहरीको पल्टन, निजामती उच्चपदस्थ कर्मचारीहरू, आशागुर्जा टोली, ब्याण्डबाजा, पञ्चेबाजा सहित सिंगारिएका कलस्यौलीहरू, सांस्कृतिक झाँकी र पाँचजना गुरु पुरोहितको समूहले हर्ष बढाईंका साथ बसन्तपुर हनुमानढोकास्थित दशैंघरमा भित्र्याउँछन् ।
आजकै दिन गोरखा दरबारमा जंगलबाट ल्याएका नवपत्रिका जयन्ती, अशोका, वेलपत्र, केरा, उखु, सामा, धान, फुन्द्रेका फूल सतिपिपलको निसान सिंगार्ने चौतारोमा राख्ने र गोरखा दरबारबाट बाजागाजा सहित आएका कलस्यौडीहरुले मालश्री गीत गाउँदै बाजा बजाउँदै फुलपातीलाई डोलीमा राखेर गोरखा दरबारमा भित्र्याउने परम्परा रहेको छ ।
फुलपाती गोरखा दरबारभित्र भित्र्याउँदा कालो बोकाको बली दिने गरीन्छ ।
आजैका दिन देशैभरिका शक्ति पिठ, देवी मन्दिर, नेपाली सेना तथा प्रहरीका तल्लोदेखि उपल्लो तहका अड्डाहरुमा बढाईंका साथ फुलपाती भित्र्याउने चलन रहेको छ । फुलपाती भित्र्याउने साईत अनुसार टुडिखेलमा नेपाली सेनाले फुलपातीको बढाईं जात्रा प्रस्तुत गर्ने गर्दछन् । नेपाली सेनाको टुकडीले तोप पड्काउँदै हर्ष बढाईं गर्ने प्रचलन परम्परादेखि नै चल्दै आएको छ ।
फूलपातीसंगै दशैं पूर्णरुपमा सुरु हुन्छ । देशै भरीको गाउँ गाउँमा आजबाट पशु बलि दिने र रमझम गर्ने प्रचलन समेत चलि आएको छ । गाउँघर देखी शहर सम्म पिङ खेलेर रमाउने पनि गरिन्छ ।
फाईल तस्विर