गोरखा समाचारदाता
गोरखा – करिब २ करोड रुपैयाँ किर्ते गरेर बैंकबाट निकालेको आरोपमा जनकपुरबाट सोमबार १ जना प्राविधिक कर्मचारी पक्राउ परेको छ ।
धनुषाको मुखियापट्टी मुसहरनीया गाउपालिका वडा नम्बर ३ बाट आरोपित प्रवीणकुमार ठाकुरलाई प्रहरीले पक्राउ गरेको हो ।
उनले प्राविधिक शिक्षा तथा व्यवसायिक तालिम परिषद् प्रदेश कार्यालयको बैंक खाताबाट किर्ते गरी १ करोड ७८ लाख १ हजार ९ सय रुपैयाँ निकाल्न सफल भएको प्रहरीको आरोप छ ।
परिषद्को प्रदेश कार्यालय प्रदेश नम्बर २ अन्तर्गत सञ्चालित विपि मेमोरियल पोलिटेक्निकल इनस्टिच्यूटका चेकहरु चोरी गरी बिभिन्न बैंकबाट विभिन्न मितिमा किर्ते गरी ठाकुरले उत्त रकम निकालेको धनुषा प्रहरीले जानकारी दिएको छ ।
परिषदमा सहायक ल्याव प्रशिक्षकको पदमा कार्यरत महोतरी गाउँपालिका वडा नम्बर १ बस्ने ४२ वर्षीय ठाकुरले परिषद् प्रदेश कार्यालय प्रदेश नम्बर २ अन्तर्गत सञ्चालित विपी मेमोरियल पोलिटेक्निकल इन्स्टिच्यूट लक्ष्मीनियाबाट ६२ लाख ५६ हजार ९सय र जनकपुरको रामानन्द चोकमा सञ्चालित प्राविधिक शिक्षा तथा व्यवसायिक तालिम परिषद् प्रदेश कार्यालय प्रदेश नम्बर २ बाट १ करोड १५ लाख ४५ हजार गरी जम्मा १ करोड ७८ लाख १ हजार ९ सय रुपैयाँ विभिन्न बैंकबाट कर्ते गरी निकालेको प्रहरीले जानकारी दिएको छ ।
परिषद् कार्यालयले जिप्रका धनुषामा गत साउन १४ गते ठाकुरले किर्ते गरी रकम निकालेको विषयमा लिखित जाहेरी दिएको थियो ।
पक्राउ परेका ठाकुरलाई प्रहरीले चोरी तथा लिखत सम्बन्धी कसुरमा मुद्दा दर्ता गरेर अनुसन्धान थालेको छ ।