गोरखा समाचारदाता
गोरखा – गण्डकी प्रदेशका सांसद हरिशरण आचार्यले गोरखाका प्रमुख जिल्ला अधिकारी देवेन्द्र लामिछानेलाई राजनीति गर्ने भए कुर्सी छोडेर मैदानमा आउन चुनौती दिएका छन ।
शनिबार गोरखा सदरमुकाममा आयोजित ‘बूढीगण्डकी जलबिद्युत आयोजनाको अबस्था र चुनौती’ बिषयक अन्तरक्रिया कार्यक्रममा गोरखा निर्वाचन क्षेत्र नम्बर २ अन्र्तगत प्रदेशसभा ‘ख’ बाट निर्वाचित हुनु भएका सांसद आचार्यले यस्तो चुनौती दिएका हुन ।
साँसद आचार्यले गोरखाको महत्वपूर्ण सरोकार राख्ने बिषयमा प्रमुख जिल्ला अधिकारी उपस्थित नहुुनु राजनीति बाहेक अरु केही नभएको बताए । ‘प्रमुख जिल्ला अधिकारी उपस्थित नहुनु यो राजनीति हो, म वहाँ प्रति खेद प्रकट गर्दछु, सांसद आर्चायले भने । किनभने यो राजनीति गर्ने ठाउँ होइन, आउनु हामीसंग राजनीति नै गर्न चाहानुहुन्छ भने चुनावमा आउनुस ।’
आरुघाट र खहरे क्षेत्रको मुअब्जा निर्धारण नहुदा लामो समयदेखि जनता मारमा परेको भन्दै सांसद आचार्यले जनतालाई जबाफ दिनुपर्ने ठाउमा नआउनु दुःखको कुरा भएको बताए । उनले भने तपाई गोरखाको इतिहासमा अर्को एउटा कालो धब्बा बनेर जादै हुनुहुन्छ ।
सांसद आचार्यले राष्ट्रिय गौरवको आयोजनाको रुपमा निर्माण गर्न लागिएको बुढि गण्डकी आयोजनाका सवालमा जनताको धेरै प्रश्नहरुको जबाफ दिनसक्नु पर्ने समेत बताए ।
शनिबार आयोजित उक्त कार्यक्रममा उर्जामन्त्री बर्षमान पुन (अनन्त) आउने भनिएपनि अन्तिम समयमा कार्यक्रममा नआए पछि सहभागीहरुले समेत रोष प्रकट गरेका थिए ।
त्यस्तै जिल्लामा मुअब्जा निर्धारणको जिम्मेवारी रहेको प्रमुख जिल्ला अधिकारी देवेन्द्र लामिछाने पनि कार्यक्रममा सहभागी नहुनुलाई नागरिक समाजले राम्रो मानेको छैन ।