गोरखा समाचारदाता
गोरखा – जनचेतना अभावका कारण समाजमा बिभिन्न खाले हिंशा बढेको सरोकारवालाहरुले बताएका छन् ।
रोडियो गोरखा र विश्वास नेपाल नामक संस्थाको आयोजनामा भएको ब्यवसायिक बाल यौन शोषण, बेचबिखन तथा बढ्दो आत्महत्या बिषयक अन्तरकृया कार्यक्रममा बोल्ने अधिकांश वक्ताहरुले सचेतना अभावका कारण हिंशाले प्रश्रय पाएको बताएका हुन् ।
‘देशले नयाँ संविधान पायो, नयाँ ब्यवस्था आयो तर त्यसले मात्रै परिवर्तन नहुदो रहेछ’ गोरखा नगरपालिकाकी उपप्रमुख विनाकुमारी श्रेष्ठले भनिन् ‘अझै पनि महिला, बालबालिकालाई हेर्ने नजर उस्तै संकिर्ण छ, जवसम्म हाम्रो सोचमा परिर्वतन हुदैन तबसम्म अहिले भइरहेका सबै खाले हिंशा र पिडाको अन्त्य हुन सक्दैन ।’ बालविवाहका कारण पनि समाजमा बिभिन्न खाले समस्या उत्पन्न भएको उनले बताइन् ।
त्यस्तै गण्डकी गाउँपालिकाकी उपप्रमुख ललिता अधिकारीले देशमा सबै खाले हिंशा विरुद्ध नीति बनेपनि कार्यान्वयनको पाटो फितलो बनेको बताएकी छिन् । ‘सधै अरुलाई दोष दिने मात्रै हाम्रो बानी छ तर आफ्नो जिम्मेवारी वहनको बिषयमा हामी सोच्दैनौ’ अधिकारीले भनिन ‘देशमा सबै खाले हिंशाका विरुद्ध नीति नियम छ तर ब्यवहारमा लागु छैन, यस कारण पनि समस्या बढेको हो ।’
कार्यक्रममा बोल्दै नेपाल पत्रकार महासंघ गोरखाका अध्यक्ष किशोरजंग थापाले समाजमा सकरात्मक भावनाको अभाव रहको टिप्पणी गरे । ‘जबसम्म हामी आफै सचेत हुदैनौ तबसम्म हामीमा हिंशा भइ नै राख्छ’ थापाले भने ‘हरेक कुरामा प्रश्न राखौ, सकरात्मक प्रतिवाद गरौ सबै खाले हिंशाको अन्त्य निश्चित छ ।’
त्यस्तै मानवअधिकार सञ्जालका संयोजक यदु अधिकारीले नागरिकका आधारभुत आवस्यकता पूर्ति हुने वातावरण नबन्दासम्म यस्ता घटना भइरहेको बताए । पश्चिमी संस्कृतीका नाममा हुने छाडापनले समेत हिंशा र आत्महत्याको दर बढेको प्याब्सन गोरखाका अध्यक्ष सीताराम तिवारीले बताएका छन् ।
संस्कार घर र विद्यालयबाट सिकाउनुपर्नेमा जोड दिदै नेपाल रेडक्रश सोसाइटी गोरखाका सभापति भगवानाबु मास्केले सामाजिक सञ्जालको दुरुपयोगका कारण समाजमा समस्या झाँगिदै गएको टिप्पणी गरे ।
नेपाल पत्रकार महासंघ गोरखाका पूर्व अध्यक्ष भिमलाल श्रेष्ठले रेमट्यिान्सको उचित सदुपयोग नहुदा मनोरञ्जनका नाममा विकृती फैलिएको धारणा राखे ।
त्यस्तै महिला मानवअधिकार रक्षक सञ्जालकी अध्यक्ष साविधी भट्टले पेशाका नाममा महिलाले आफ्नो पहिचान गुमाउन नहुनेमा जोड दिइन् । महिला र बालबालिकालाई समाजले मनोरञ्जनको साधनका रुपमा मात्रै हेर्दा समस्या बढेको उनको तर्क छ ।
कानुन परिवर्तन भएपनि नागरिकको ब्यवहार परिवर्तन नहुदा दिनानुदिन बिभिन्न खाले हिंशाका घटनाका उजुरी बढेको जिल्ला प्रहरी कार्यालयकी प्रहरी निरिक्षक कमला नरालले बताइन् ।
विश्वास नेपालका अध्यक्ष तारा भण्डारीको अध्यक्षतामा भएको कार्यक्रममा नेपाल टूेड युनियन काँग्रेस गोरखाका अध्यक्ष सरद श्रेष्ठ, गोरखा उद्योग बाणिज्य संघ महिला उद्यमी विकास समितिका अध्यक्ष रीता रेग्मी, सौन्दर्य कला ब्यवसायी संघका अध्यक्ष सुकु श्रेष्ठ, सुमती श्रेष्ठ लगायतले बोलेका थिए ।
कार्यक्रममा विश्वास नेपालका कार्यक्रम संयोजक परशुराम चौधरीले गोरखा सहित बिभिन्न जिल्लामा भएका बाल योन शोषण, बेखबिचन तथा आत्महत्या लगायतका घटनाको अवस्थाका बारे कार्यपत्र प्रस्तुत गरेका थिए । कार्यक्रमको सहजीकरण रेडियो गोरखाका सहायक स्टेशन मेनेजर नरहरी सापपकोटाले गरेका थिए ।