गोरखा समाचारदाता
गोरखा – नेपाल रेडक्रस सोसाइटी जिल्ला शाखा गोरखाले विभिन्न कार्यक्रम गरी ५७ औं स्थापना दिवश मनाएको छ ।
दिवशको अबसरमा भएको खुल्ला रक्तदान कार्यक्रममा ८५ जनाले रक्तदान गरेका छन् । जिल्ला सदरमुकाममा भएको कार्यक्रममा १३ जना महिला र ७२ जना पुरुषले रगत उपलब्ध गराएको रेडक्रस जिल्ला शाखाका कार्यालय सचिव सुबास घिमिरेले जानकारी दिए ।
रेडक्रस भवन परिसरमा भएको कार्यक्रममा जिल्ला सभापती भगवानबाबु मास्कले रक्तदान गर्दे कार्यक्रम उद्घाटन गरेका थिए । बिहीबार जिल्लामा संकलित भएको ८५ पिन्ट र केही दिन अघि सशस्त्र प्रहरीले संकलन गरी १० पिन्ट गरी ९५ पिन्ट रगत नेपाल रेडक्रस सोसाइटी रक्त सञ्चार केन्द्र भरतपुर पठाइएको छ ।दिवशकै अवसरमा ताप्ले उपशाखाले खुल्ला दौड प्रतियोगिता गरेको छ ।
४५ जना सहभागी प्रतियोगितामा दिनेश नेपाली पहिलो, धिरन आले दोश्रो, जीवन थापा तेश्रो, सुजित थापामगर सान्त्वना भएका भएका छन् । उपशाखा सभापती टिका बोगटीको अध्यक्षता तथा जिल्ला शाखाका उपमन्त्री भिमसेनकाजी बानियाँको प्रमुख आतिथ्यतामा भएको कार्यक्रममा गोरखा नगरपालिका १ अध्यक्ष हिक्मत बहादुर कँुवर र २ का अध्यक्ष रहम्तुल्ला मियाँले मन्तव्य राखेका थिए ।
यसैगरी श्रीनाथकोट उपशाखाको आयोजनामा विपद् व्यवस्थापन तथा न्यूनीकरणमा युवा वर्गको भूमिका विषयक सिरानचोक गाउँपालिका स्तरिय वक्तृत्वकला प्रतियोगिता भएको छ । उपशाखाका सभापती बलराम ढकालको अध्यक्षता तथा सिरानचोक गाउँपालिकाका अध्यक्ष राजु गुरुङको प्रमुख आतिथ्यतामा भएको कार्यक्रममा जिल्ला सभापती भगवानबाबु मास्के, शिक्षा शाखाका प्रमुख ज्ञानेन्द्र पोखरेल, वडा नम्बर ७ का अध्यक्ष सुरज ढकाल लगायतले मन्तव्य राखेका थिए ।
१० विद्यालयको सहभागीता रहेको प्रतियोगितामा संसारी महेन्द्र माबि नयाँ साँघुका खालिद मियाँ पहिलो, जनज्योति मावि चिफ्लेटीकी दिपिना उपरकोटी दोश्रो, परोपकार आदर्श मावि जौवारीका अंकिता दवाडी तेश्रो भएका छन् । यसैगरी संसारी महेन्द्र माविको जुनियर रेडक्रस सर्कलको आयोजनामा विपद् व्यवस्थापनमा जुरेस सर्कलको भूमिका विषयमा निवन्ध लेखन प्रतियोगिता भएको छ ।
उक्त प्रतियोगितामा सिरानचोक गाउँपालिका भित्रका ६ वटा माध्यामिक विद्यालयका १२ जना विद्यार्थीको सहभागीता रहेको थियो । दिवशका अवसरमा भएका सबै प्रतियोगिताका विजेताहरु क्रमश पहिलो, दोश्रो, तेश्रो र सान्त्वना हुनेले ५ हजार, ३ हजार, २ हजार र १ हजार नगद पुरस्कार साथमा मेडल र प्रमाणपत्र पाएका छन ।
जिल्लामा रहेको २५ वटा उपशाखा मध्ये अधिकाशंले विभिन्न कार्यक्रम गरी स्थापना दिवश मनाएको खवर प्राप्त भएको छ ।
