गोरखा समाचारदाता
उत्तरी गोरखाको धार्चे गाउँपालिकाले आवाधिक योजना निर्माणका सन्र्दभमा विज्ञहरुसँग सुझाव मागेको छ ।
जिल्ला सरमुकाममा कार्यशाला गोष्ठी गर्दै उक्त योजनामा समेट्न सकिने विषयका बारेमा सुझाव संकलन गरिएको हो । ‘अधिकाशंले हामीलाई जडिबुटी प्रवद्र्धनमा जोड दिने खालका कार्यक्रम ल्याउनु पर्छ भन्नुभयो’ गाउँपालिका अध्यक्ष सन्तोष गुरुङले भने ‘पर्यटनलाई पनि जोड दिनु पर्ने धेरैको सुझाव छ ।’ आवाधिक योजना र वस्तुगत विवरण पृष्टीकरण विषयक उक्त कार्यशालामा बोल्ने अधिकाशं वक्ताहरुले जनताको आवश्यकता र भूगोललाई ख्याल गरी योजना निर्माण गर्न सुझाव दिएका छन् ।
उनीहरुले सामाजिक, आर्थिक, भौतिक, सांस्कृतिक र मानविय पक्षहरुको बिकासलाईसँगै लगेपछि मात्र गाउँपालिका समृद्धी हुने बताए । विना योजना बिकास निर्माणका काम अस्तव्यस्त हुने भन्दै उनीहरुले ढिलै भएपनि योजना निर्माण हुनु खुसिको कुरा भएको बताएका छन् । ‘चालु वर्षको बजेटलाई पनि यसै योजना मार्फत खर्च गर्ने हाम्रो सोच छ’ गाउँपालिका अध्यक्ष गुरुङले भने ‘अब हामी गत वर्ष जस्तो टुक्रे योजनामा बजेट खर्च गर्ने छैनौं ।’ आवाधिक योजना निर्माणका क्रममा विभिन्न चरणमा गाउँपालिकाको जनसंख्या, भौतिक अवस्थिती, समाजिक साँस्कृतिक पहिचान, संभावनाका क्षेत्रहरु सबैको तथ्याङ्क संकलन भईसकेको छ । प्राप्त सुझावका आधारमा आवाधिक योजनालाई अन्तिम रुप दिने तयारी भइरहेको उनले बताए ।
आवाधिक योजनाको प्रगती र त्यसमा समेट्नु पर्ने विषयका बारेमा सुझाव संकलन गर्ने उदेश्यले गरिएको उक्त कार्यक्रममा धार्चे घर भई जिल्ला सदरमुकाम र काठमाण्डौमा बस्नेहरुको सहभागिता रहेको थियो । कार्यक्रममा जिल्ला समन्वय समितिकी उपप्रमुख जनुका अधिकारी, पूर्व सचिव गंगाधर अवस्थी, गैरसरकारी संस्था महासंघका अध्यक्ष सिताराम श्रेष्ठ जिल्ला वन डिभिजन कार्यालयका प्रमुख तोयानाथ पौडेल, पद्धती बिकास सेवा केन्द्रकी कमला लामिछाने लगायतले मन्तव्य राखेका थिए ।