गोरखा समाचारदाता
साउन १४ गते । गोरखाको पालुङटार नगरपालिकामा सत्तारुढ दल नेकपाको नगर कमिटी गठनमा विवाद देखा परेको छ ।
नेता नारायणकाजी श्रेष्ठको सो क्षेत्रमा आकांक्षीको व्यवस्थापन हुन नसक्दा नगर कमिटी गठनमा ढिलाई समेत भएको छ । केन्द्रमा पार्टी एकीकरण र नेताहरुको जिम्मेवारी बाँडफाँटलाई लिएर सकस भइरहेका बेला केही स्थानीय तहमा नेतृत्वलाई लिएर विवाद बढीरहेको छ । पालुङटार नगर कमिटीको अध्यक्षमा गुणराज देवकोटा र विकास वाग्लेले दावी गरेका छन् ।
देवकोटा पूर्व माओवादी केन्द्रका नगर कमिटी पूर्व उपाध्यक्ष हुन् भने वाग्लेले सचिवको जिम्मेवारी सम्हालेका थिए । देवकोटा पालुङटार नगरपालिकाको मेयरमा पराजित भएका थिए । नगर कमिटी गठन गर्ने विषयमा केन्द्रीय नेतृत्वले समेत निर्णय गर्न सकेको छैन । नेतृत्वलाई लिएर नगरपालिकामा समेत स्थानीय नेता विभाजित देखिएका छन् ।
देवकोटा पालुङटार नगरपालिकाको मेयरमा उठ्दा पराजित भएकाले स्थानीय नेता वाग्लेको पक्षमा देखिएका छन् । वाग्ले तत्कालिन माओवादीका पोलिटव्यूरो सदस्य एवं शहिद सुरेश वाग्लेका छोरा समेत हुन् ।
शहिद परिवारबाट प्रतिनिधित्व गर्ने र जिल्लामा बढी सक्रिय भएकाले स्थानीय नेता कार्यकर्ताको अभिमत वाग्लेप्रति रहेको युवा नेता दुर्गा श्रेष्ठले जानकारी दिए ।