प्रजित शाक्य
काठमाडौँ, साउन ११ गते । बसन्त रेग्मी र सन्दीप लामिछानेको बलिंग र कप्तान पारस खड्काको ब्याटिंगको सहयोगमा नेपालले शनिबार कुवेतलाई सात विकेटले हराएर आइसीसी टि२० विश्वकप एसिया फाइनल्सको विजेता बन्ने लक्ष्यको नजिक पुगेको छ ।
सिंगापुरस्थित इन्डियाना एसोसियन क्रिकेट मैदानमा टस जितेर पहिले फिल्डिंग गरेको नेपालले ब्याटिंग पिचमा कुवेतलाई नौ विकेटको क्षतिमा १४१ रनमा रोकको थियो । त्यसपछि पारसले विस्फोटक अर्धशतकीय पालि खेलेपछि नेपालले १५.५ ओभरमा नै तीन विकेटको क्षतिमा १४३ रन बनाएर जित हात पार्यो ।
नेपालले अब आयोजक सिंगापुरविरुद्ध अन्तिम दिन अन्तिम खेल खेल्नेछ । जुन खेल फाइनलमा परिमार्जित भएको छ । सो खेल जित्ने टिम आइसीसी टि२० विश्वकप एसिया फाइनल्स २०१९ को च्याम्यिन बन्नेछ । नेपालले सिंगापुरविरुद्ध जितेमा युईमा हुने अन्तिम खुड्किलो ग्लोबल विश्वकपमा खेल्न योग्य हुनेछ । सो प्रतियोगितामा शीर्ष छ स्थानमा रहने सके नेपालले सन् २०२० अक्टोबलमा अस्ट्रेलियामा हुने टि२० विश्वकप खेल्नेछ ।
आयोजक सिंगापुर प्रतियोगितामा अपराजित एक मात्र टिम हो । यद्यपि उसलाई अगाडि बढ्न आइतबार नेपाललाई रोक्नुपर्ने हुन्छ । अंक तालिकाको शीर्ष स्थानमा रहेको सिंगापुरको तीन खेलबाट पाँच अंक छ । नेपाल आजको जितसहित चार अंकसहित दोस्रो स्थानमा उक्लेको छ ।
पारस खड्काले उपकप्तान ज्ञानेन्द्र मल्लसँग मिलेर पहिलो विकेटका लागि २३ बलमा ४४ रनको साझेदारी निर्वाह गरेपछि नै नेपाल सहज जिततर्फ अग्रसर भएको थियो । ज्ञानेन्द्र १३ बलमा १९ रन बनाएर आउट हुनुभयो । मोहम्मद कासिफको ओभरमा लगातार एक छक्का र दुई छक्का प्रहार गरेपछि ज्ञानेन्द्र क्याच आउट हुनुभयो ।
यद्यपि पारसले ४२ बलमा ६८ रन बनाएर ज्ञानेन्द्र आउट भएको दबाब नेपाललाई पर्न दिनुभएन । टि २० अन्तर्राष्ट्रिमा पारसको यो तेस्रो अर्धशतकीय पालि हो । नेपालका लागि यस संरचनामा तीन अर्धशतक बनाउने पारस एक मात्र ब्याट्सम्यान पनि हुनुहुन् छ। पारसको कप्तानी पालिमा एघार चौका र एक छक्का सामेल थियो । यसैगरी, अर्का अनुभवी ब्याट्सम्यान शरद भेष्वाकर ३० बलमा ३८ रन बनाएर अन्तसम्म आउट हुनुभएन । उहाँले चार चौका र एक छक्का पहार गर्नुभयो । नेपालले खेल जित्दा शरदसँगै रोहित पौडेल (६) हुनुहुन्थ्यो ।
कुवेतका लागि नेपालले गुमाएका तीन विकेट कासिफले लिनुभयो । कासिफले ज्ञानेन्द्र र पारससँगै दिपेन्द्र सिंह ऐरी (१ रन) लाई पनि आउट गर्नुभएको थियो ।
यसअघि, तेज बलर करण केसीले प्रारम्भिक ब्याट्सम्यान मित भाब्सरलाई पाँच रनमा पवेलियन फर्काएर नेपाललाई शानदार सुरुवात दिलाउनुभएको थियो । अदनान इद्रिस र सविना सान्दरुवानले दोस्रो विकेटका लागि तेज गतिमा ३१ रनका साझेदारी निर्वाह गरी पालि उकास्ने प्रयास गर्नुभयो । यद्यपि अनुभवी स्पीनर बसन्त रेग्मीले आप्mनो पहिलो ओभरमा नै दुई झटका दिएर कुवेतको पालि कमजोर बनाउनुभयो । कुवेतको पालिको छैटौँ ओभरमा बसन्तले अदननलाई २५ र सान्दरुवानलाई १५ रनमा आउट गर्नुभयो । अदनान चार चौका प्रहार गरेर शानदार लयमा देखिनुभएको थियो ।
त्यसपछि नवौँ ओभरमा पनि नेपाललाई दुई विकेट प्राप्त भयो । स्टार स्पीनर सन्दीपले विलाल ताहिर र उस्मान वाहिदलाई शुन्यमा पवेलियन फर्काउनुभयो । जसले कुवेतको स्कोर पाँच विकेटको क्षतिमा ६४ रन भएको थियो ।
यस्तो संकटको समयमा कुवेतका मोहम्मद कासिफले३६ बलमा चार छक्का र दुई चौकासहित विजित ४९ रन बनाएर कुवतेको पालि सम्मानजनक बनाउनुभएको थियो । तर कप्तान पारसको अर्धशतकीय पालिले सो स्कोर पनि नेपालका लागि सामान्य बन्यो ।
नेपाल कालागि सन्दीप र बसन्तले समान तीन, तीन विकेट लिनुभयो । बसन्तले चार ओभरमा २० र सन्दीपले चार ओभरमा २१ रन दिनुभयो । बसन्त तीन विकेट लिएर टि२० अन्तर्राष्ट्रिय क्रिकेटमा नेपालका लागि सवाृधिक विकेटकर्ताको सूचीम अग्रस्थानमा उक्लनुभएको छ । बसन्तको विकेट संख्या २५ पुगेको छ । सोमपालको खातामा २३ विकेट रहेको छ ।
gorkhapatra