गोरखा समाचारदाता
पुनःनिर्माण प्राधिकरणले जिल्लाका ४ हजार ७५ जनाको नाम लाभग्राहीको सूचीबाट हटाएको छ । हाल सम्म अनुदान सम्झौता गर्न नआएका त्यस्ता लाभग्राहीलाई प्राधिकरणले असार २१ गते सम्मको समय सिमा दिएको थियो । उक्त समय सिमा भित्र अनुदान सम्झौता नगरेका र सम्झौता गरे पनि असार मसान्त भित्र पहिलो किस्ता रकम नलिएकाहरुलाई सूचीबाट हटाएको हो । प्राधिकरणले देशभर बाट ६३ हजार ८ सय ४९ गैर लाभग्राही कामय गरेको छ । ती मध्ये ५ हजार ५ सय ४० ले अनुदान सम्झौता गरेर पनि रकम नलगेको देखिन्छ ।
गोरखाबाट हटाएका मध्ये २ हजार ९५ ले पुनःनिर्माण र १ हजार ९ सय ८० प्रवलीकरण अनुदान प्राप्त गर्नुपर्ने सूचीमा थिए । ७१ हजार १ सय ६२ लाभग्राही रहेकामा ६७ हजार ८७ ले पहिलो, ५९ हजार ६ सय ६१ ले दोश्रो र ५३ हजार ९ सय १३ ले तेश्रा किस्ता लिएका छन् । तीमध्ये ६५ हजार ८ सय ९पुर्नःनिर्माण र ५ हजार ३ सय ५३ प्रवलीकरणका लाभग्राही हुन् ।
सूचीबाट हटाएका मध्ये आरुघाट गाउँपालिकामा १ सय ५९, अजिरकोटमा १ सय २०, भीमसेन थापामा १ सय ३३, चुमनुब्रीमा ३ सय ३३, धार्चेमा ३ सय ३९ र गण्डकीमा ७ सय ४१ घर रहेका छन् । यसैगरी गोरखा नगरपालिकामा ५ सय ११, पालुङ्टार नगरपालिकामा ९ सय , शहिदलखन गाउँपालिकामा ३ सय २४, सिरानचोकमा ३ सय २४, बारपाक सुलिकोटमा १ सय ८१ गरी कुल ४ हजार ७५ ले अनुदान सम्झौता नगरेको भन्दै सूचीबाट हटाएको जिल्ला आयोजना कार्यान्वयन इकाइका अम्बिका पौडेलले जानकारी दिए ।
प्राधिकरणले समयमा अनुदान सम्झौता नगर्ने र पहिलो किस्ता नलिनेको अब अनुदान सम्झौता गर्ने र पहिलो किस्ता दिने कार्य स्थगित गर्न सबै निकायहरुलाई निर्देशन दिइसकेको छ ।
प्राधिकरणले यसरी अनुदान सम्झौता गर्न र पहिलो किस्ता लिन नआएकालाई सुनुवाइको विकल्प भने दिएको छ, जस अनुसार अनुदान सम्झौता गर्न छुटेका र पहिलो किस्ता लिन नआएकाहरु मध्ये कसैले पर्याप्त कारण सहित स्थानीय निकायमा निवेदनदिन सक्ने छन् र प्राप्त निवेदनको विश्लेषण गरी प्राधिकरणले आवश्यक निर्णय लिने छ । सह प्रवक्ता मनोहर घिमिरेले गुनासो, जोखिममा परेका लगायतबाट २०७६ जेष्ठ मसान्त पछि पुनःर्निर्माण लाभग्राहीमा सूचीकृत भएकाहरुको हकमा भने अनुदान सम्झौता गर्ने र पहिलो किस्ता दिने कार्यलाई निरन्तरता दिइने जानकारी दिए ।