गोरखा समाचारदाता
असोज १६ गते । यहि अशोज २० गतेबाट सुरु हुने दशै सस्तो बजार एवं सडक मेलाको ७० प्रतिशत तयारी पुरा भएको छ । आयोजक गोरखा चेम्बर अफ कमर्सले सदरमुकाममा पत्रकार सम्मेलन गर्दै बाँकी काम १९ गते सम्म सम्पन्न गर्ने दाबी गरेको छ । ‘जोडतोडका साथ तयारी भइरहेको छ’ गोरखा चेम्बर अफ कमर्सका अध्यक्ष भाइचन्द्र श्रेष्ठले भने ‘बाँकी केही काम छन्, १९ गते सम्म पुरा हुन्छ ।’
१३० वटा स्टल रहनेमा मेलामा सय वटा व्यापारिक प्रयोजनका स्टल राखिने छ । अन्यमा कृषि, पशु, स्थानीय स्तरमा उत्पादित सामानहरुको प्रवद्र्धन गरिने उनले बताए । व्यापारिक प्रयोजनका लागि राखिने स्टलहरुले निश्चित शुल्क बुझाउनु परेपनि प्रर्वद्धनात्मक स्टलहरु निशुल्क रुपमा राख्ने तयारी गरिएको छ । ‘स्थानीय उत्पादनको प्रवद्र्धन गर्न स्टल भाडा समेत नलिने हाम्रो तयारी छ’ उनले भने ‘त्यस्ता स्टल २० देखि ३० सम्म हुने अपेक्षा छ ।’
१० दिन सम्म चल्ने मेलामा ४० हजार देखि ६० हजार सम्म दर्शकले अबलोकन गर्ने र ६ करोडको कारोबार हुने आयोजकको दाबी छ । मेला सम्पन्न गर्नका लागि विभिन्न विषयगत समितिहरु पनि निर्माण गरिएको छ । उक्त समितिले आफ्नो तयारी गरिरहेका छन् । दशैलाई लक्षित गरी मेला सञ्चालन गरिएकाले सुपथ मुल्यमा दैनिक उपभोग्य सामाग्री समेत उपलब्ध गराउने आयोजकले बताएको छ । ‘बजारका विभिन्न ठाउँमा १०÷१२ वटा सुपथ पसल सञ्चालन हुन्छन’ उनले भने ‘त्यहाँबाट नुन, चिनी, खाने तेल लगायतको सामाग्री किन्न पाउने व्यवस्था मिलाएका छौ ।’ साल्ट टेड्रिङ कर्पोरेसनसँगको समन्वयमा हाल भइरहेका किराना पसलबाट नै सुपथ मुल्यमा ती सामाग्री उपलब्ध गराउने तयारी आयोजकको छ ।
दशैलाई लक्षित गरी खसी बोका बिक्रि, उत्तरी गोरखाको आलु, भिर मौरीको मह, दुधका विभिन्न परिकारहरु, केराका विभिन्न परिकारहरु, विभिन्न जातजातीका पहिचान झल्कने खानाका परिकारहरु मेला स्थलमा रहेका स्टलहरुमा उपलब्ध हुने बताइएको छ ।
खेलकुद मैदान हरमटारीमा मेलाको मुख्य प्रर्दशनी कक्ष राखिने भएपनि नयाँ बसपार्क देखि हरमटारीको प्रतिक्षालय चोक सम्म बजारलाई झकिझकाउ बनाएर सडक मेला गर्ने तयारी गरिएको छ । मेलामा हरेक दिन विभिन्न राष्ट्रिय तथा स्थानीय कलाकारहरुको सांगितिक प्रस्तुती हुनुका साथै चोक चोकमा पनि कार्यक्रम गर्ने आयोजकले बताएको छ । विजया दशमीको अबसर हुने मेलामा निमित दुर्गा पुजाको समेत व्यवस्था मिलाइएको छ ।

लेखकबाट थप:

• लकडाउन नियम उलंघन गरेपछि सेल्टिक र एबरडीनबीचको खेल स्थगित
• पारिवारीक बनमा ठकुरी
• नेपालमै बन्छ विश्वका ७० देशलाई चाहिने आँखाको लेन्स
• सबै वडामा स्वास्थ्य चौकी बनाउने योजना
• टेष्ट वरियतामा कोहली शिर्ष स्थानमा उग्लिए