मोहसिन अलि मियाँ/गोरखा
साउन ५ गते । जिल्ला ट्राफिक प्रहरी कार्यालय गोरखाले अघिल्लो आर्थिक बर्षको दाँजोमा गत बर्ष २० लाखभन्दा बढि राजश्व संकलन गरेको छ । आर्थिक बर्ष ०७३/७४ मा ५१ लाख ५३ हजार ५ सय राजश्व उठाएको ट्राफिक कार्यालयले २०७४/७५ मा ७१ लख ६० हजार राजश्व संकलन गरेको हो । जिल्ला ट्राफिक कार्यालयको तथ्यांकमा उल्लेख भएअनुसार गत बर्ष अघिल्लो बर्षको दाँजोमा २० लाख ६ हजार ५ सय बढि संकलन भएको देखिन्छ ।
‘यो बर्ष हामीले अघिल्लो बर्षको भन्दा २० लाख भन्दा बढि राजश्व उठाएका छौ, तर हाम्रो तार्गेट राजश्व बढि उठाउने होइन, नियम उल्लंघन गर्नेलाई कारबाही गर्दा बढी रकम उठ्यो’ जिल्ला ट्राफिक कार्यालय गोरखाका प्रमुख दयाराम पौडेलले भने । यस बर्ष जिल्लामा १० हजार ९ सय ७० सवारी साधन कारबाहीमा परेका थिए भने अघिल्लो आर्थिक बर्ष २०७३÷७४ मा ८ हजार सवारी साधनलाई कारबाही गरिएको थियो । ‘यो बर्ष कारबाहीमा पर्ने सवारी साधनको संख्या नै बढेको छ, संख्या बढ्दा राजश्व त यसैपनि बढ्ने नै भयो’ ट्राफिक प्रमुख पौडेलले भने ।
अघिल्लो बर्षको तुलनामा गत आर्थिक बर्ष २०७४÷७५ मा २ हजार ९ सय ७० वटा बढि सवारी साधन कारबाहीमा परेको ट्राफिक कार्यालयको भनाई छ । गत आर्थिक बर्षमा कारबाहीमा पर्ने १० हजार ९ सय ७० सवारी साधन मध्ये सबैभन्दा बढि ट्रिपर÷ट्रक रहेका छन् । जिल्लाभरमा एक बर्षभरि कारबाहिमा पर्ने ट्रिपर÷ट्रकको संख्या ४ हजार ५ सय ७६ छ जसबाट मात्रै २९ लाख ३ हजार राजश्व संकलन भएको तथ्यांकमा उल्लेख छ ।
त्यस्तै २ हजार २७ वठा ट्याक्टर कारबाहीमा पर्दा १३ लाख १९ हजार ५ सय राजश्व उठेको थियो भने ट्राफिक नियम उल्लंघन गर्ने १ हजार ८ सय ३४ मोटरसाइकल कारबाहीमा परेका थिए । जसबाट १३ लाख ५१ हजार राजश्व संकलन भएको छ । त्यसैगरी १ हजार ३ सय ८८ वटा जिप, कार र भ्यानले नियम उल्लंघन गर्दा ८ लाख ९४ हजार ५ सय राजश्व असुली गरेको ट्राफिक कार्यालयले जनाएको छ । त्यस्तै कारबाहीमा पर्नेमा बसबाट ६ लाख ९२ हजार राजश्व उठेको छ जसमा १ हजार १ सय ७५ बसले ट्राफिक नियम उल्लंघन गरेको भन्दै कारबाहीमा परेका थिए ।
अघिल्लो आर्थिक बर्षको तुलनामा गत बर्ष जिल्लामा सवारी साधनको संख्या समेत बढेकाले कारबाही धेरै सवारी परेको ट्राफिक प्रमुख पौडेलको भनाई छ । ‘अहिले जिल्लामा पुनःनिर्माण चलिरहेको छ, बिगतका बर्षहरुमा भन्दा अहिले सयौ ट्रिपर, ट्याक्टरहरु बढेका छन्, अनि नियम पनि बढि तिनिहरुले नै उल्लंघन गरेको भेटिन्छ’ प्रमुख पौडेलले भने ‘अहिले ट्राफिकको सक्रियतामा पनि हामीले बढाएका छौ, नियम मिच्ने जो काही होस हामीले कारबाही गरेका छौ ।’
जिल्लामा कारबाहीमा पर्ने अधिकांश सवारी साधनबाट ५ सय देखि १ हजार ५ सयसम्म मात्रै जरिवाना असुली गरिएको उनको भनाई छ । ट्राफिकले सवारी साधनलाई बढी कार्वाही गरेर कसरी बढी राजस्व संकलन गर्न सकिन्छ भन्ने उदेश्य नभई नियम उल्लंघन गर्नेलाई कारबाही गर्दा यति ठूलो मात्रामा राजश्व संकलन भएको कार्यालयले जनाएको छ । ‘हाम्रो नियत बढि राजश्व उठाउने होइन, तर नियम उल्लंघन गर्नेलाई छोड्ने कुरा पनि भएन, जरिवाना लिनै परयो’ पौडेलले भने ‘हाम्रो उदेश्य त दुरघटना कम गराउने हो ।’