नरेन्द्र ढकाल/गोरखा
बैशाख १० गते । एसइई परिक्षा दिन काठमाण्डौ जानुपर्छ भने पछि समता शिक्षा निकेतन पढ्ने विद्यार्थी र तिनका अभिभावक शसंकित भएका छन् । गत शैक्षिक सत्रमा कक्षा ९ उत्र्तीण १८ जना विद्यार्थी र तिनका अभिभावकको मनमा अनेक आशंका उब्जिएको छ । ‘प्रिन्सिपल सरले पढ्न त यहीँ पढे हुन्छ तर एसईईको जाँच दिन काठमाण्डौ जानुपर्छ भनेर भन्नु भाको छ’ समता शिक्षा निकेतनको कक्षा १० मा पढ्ने अनिश सिर्मलकी आमा मनिसा परियारले भनिन् ।
यदी गोरखा बाहिर काठमाण्डौ, चितवन लगायतका समताका शाखामा पढ्न जान सक्ने बताएको विद्यालयलाई उदृत गर्दै अभिभावकहरुले बताएका छन् । ‘अब पैसा खर्च गरेर काठमाण्डौ पठाउन पनि सकिदैन्, फेरी यी केटाकेटीलाई कहाँ पढ्न पठाउँनु हामीलाई त पर्नु पिर परेको छ मनिसाले थपिन ।
१८ जना विद्यार्थीले कक्षा ९ उत्र्तीण गरेको त्यहाँ पहिलो पटक १० कक्षाको पढाई सुरु भएको हो । तर परिक्षा दिन काठमाण्डौ जानुपर्ने चर्चा बाहिर आएसँगै विद्यार्थी र तिनका अभिभावकहरु अहिले आफ्ना छोरा छोरी लिएर अन्य विद्यालयमा सोध पुछका लागि पुगेका छन् । ‘दश कक्षामा पढ्न मिल्छ कि मिल्दैन भनेर कतिजना अभिभावक त अरु स्कूलमा पनि सोध्नु जानुभएको छ, सबैले मिल्दैन भन्नु हुन्छ रे’ मनिशाले दुखेसो पोखिन् ।
भर्खरै नौ कक्षा उत्र्तिण अर्का विद्यार्थी दिपेश सुनारलाई अहिले निकै चिन्ता छ । ‘यो स्कूलको एसइई दिने हामी नै पहिलो ब्याज हो, समताका देशभरका विद्यालयहरुले काठमाण्डौ गएर जाँच दिन्छन रे’ दिपेशले भने ‘प्रिन्सिपल सरले हामीलाई पनि काठमाण्डौ जानुपर्छ भन्नुभएको छ ।’ उनका बुबा दिपक सुनार आईतबार छोराले पढ्ने विद्यालय पुगे । दुई घण्टा सम्म विद्यालयमा छोराको भविष्य बारे प्रिन्सिपल सँग कुराकानी गरेका उनी भन्छन् ‘सरले सबै अभिभावकहरुलाई भेला पारेर कुरा गर्छु भन्नु भएको छ, हामीलाई त चिन्ता पो लागिरहेको छ ।’
समताको उक्त कुरा सार्वजानिक भएसँगै गोरखा सदरमुकामको शैक्षिक वृतमा हल्लिखल्ली मच्चिएको छ । सो बारेमा बुझ्न खोज्दा हामीले पाएको नम्बर बारम्बार फोन गर्दा विद्यालयका पिन्सिपलको फोन उठेन । समताले एसइईका लागि गोरखाका विद्यार्थी काठमाण्डौ लानुपर्छ भनेपछि उसले कक्षा ९ र १० को स्वीकृती नै नलिएको हुन सक्ने आशंका बढेको छ ।
यसबारेमा हामीले जिल्ला शिक्षा अधिकारी दिपेन्द्र सुवेदीसँग प्रतिक्रिया माग्दा उनले भने ‘उहाँ हल्ला आज मैले पनि सुनेको छ, अबेर जानकारी आएकाले विद्यालयको अभिलेख पनि हेर्न भ्याएको छैन, भोली विद्यालयमा गएर सबै कुरा बुझे पछि प्रतिक्रिया दिन्छु ।’ देश भर सर्व सुलुभ शुल्कमा गुणस्तरिय शिक्षा प्रदान गरेको भनी चर्चामा आएको समता शिक्षा निकेतनले गोरखामा भने अनुमती बिनै कक्षा ९ र १० सञ्चालन गरेको कतिपय विद्यालयका शिक्षकहरुले आरोप लगाएका छन् ।
विद्यार्थी सरुवाका लागि अनुमती पनि नदिने र एसइई परिक्षा दिन काठमाण्डौ जानुपर्छ भन्ने कुरा गरेँ सँगै अनुमति नलिएको पुष्ठी हुने उनीहरुको तर्क छ ।
