गोरखा समाचारदाता
शहिद लखन गाउँपालिका वडा नम्बर ७ बुंकोटले सामुदायिक विद्यालयमा विद्यार्थीको आकर्षण बढाउन विभिन्न कार्यक्रम गर्ने भएको छ ।
उक्त वडाका ५ वटै सामुदायिक विद्यालयको इसिडी र कक्षा १ मा पढ्ने विद्यार्थीहरुलाई निशुल्क खाजाको व्यवस्था गर्न लागिएको वडा अध्यक्ष शरण श्रेष्ठले जानकारी दिए । ‘अब बुकोट बासीहरुले आफ्ना छोरा÷छोरी सामुदायिक विद्यालयमा पढाउनु हुन्छ भने इसिडी र कक्षा १ मा पढ्ने बाबुनानीलाई खाजा खुवाउँछौ’ उनले भने ।
ती विद्यार्थीहरुलाई वर्षभरी निशुल्क शैक्षिक सामाग्री समेत उपलब्ध गराउने वडा कार्यालयले तयारी गरेको छ । उक्त वडा भित्रका ५ वटा सामुदायिक विद्यालयको प्राधानाध्यक, विद्यालय व्यवस्थापन समितिका अध्यक्षहरु र जनप्रतिनिधि विच बुधबार छलफल भएको छ ।
सामुदायिक विद्यालयको शैक्षिक स्तर उकास्न भर्ना अभियानका लागि घर दैलो कार्यक्रम गर्ने, विद्यार्थी आकर्षित गर्न इसिडी र कक्षा १ मा पढ्ने विद्यार्थीहरुलाई निशुल्क खाजा र शैक्षिक सामाग्रीको व्यवस्था गने, कक्षा १ सम्म अग्रेजी माध्यमबाट पढाउने निर्णय गरेको श्रेष्ठले बताए ‘नयाँ शैक्षिक शत्रबाट कक्षा १ मा अंग्रेजी माध्यममा पढाउने योजना बनाएका छौ’ सोका लागि शिक्षकहरुलाई तालिम दिने र प्रविधि मैत्री कक्षा निर्माणमा पहल गर्ने वडा कार्यालयको योजना छ ।
सामुदायिक विद्यालयमा विद्यार्थी आर्कषण गराउन र विद्यालयको शैक्षिक स्तर उकास्नका लागि आगामी बैशाख १५ देखि १९ सम्म ५ वटै विद्यालयमा छुट्टाछुट्टै भेला गरी शिक्षक, अभिभावक र सरोकारवालाहरुसँग छलफल गर्ने तयारी गरिएको वडा अध्यक्ष श्रेष्ठले बताए ।
सामुदायिक विद्यायलहरुको नजिता निराशाजनक देखिए पछि जिल्लाका अन्य स्थानिय तहले पनि गुणस्तर सुधारका लागि भन्दै विभिन्न कार्यक्रमहरु शुरु गरेको बताएका छन ।
