नरेन्द्र ढकाल/गोरखा
चैत्र ११ गते । सरकारी क्षेत्रको एक्लो प्रयासले मात्र स्थानीय तहको समृद्धि सम्भव नभएको धार्चे गाउँपालिकाले निष्कर्ष निकालेको छ । सरकारी सिमित श्रोत र साधनले गाउँपालिकाबासीको अपेक्षा पुरा गर्न नसक्ने भन्दै धार्चेले सार्वजानिक निजि साझेदारी बिधिलाई जोड दिने तयारी गरेको गाउँपालिका अध्यक्ष सन्त बहादुर गुरुङले बताए । ‘हामी धार्चेमा बढि भन्दा बढि निजि क्षेत्रका साथीहरुलाई भित्रयाउन चाहान्छौ, त्यसका लागि आवश्यक तयारी भइरहेको छ’ उनले भने । पर्यटन उद्योगलाई मुख्य प्राथमिकतामा राखेर पहिलो वर्षको निति तथा कार्यक्रम निर्माण गरेको धार्चेले त्यससँग सम्बन्धित विभिन्न शीर्षकमा लगानीका लागि निजि क्षेत्रलाई आब्हान समेत गरेको छ ।
गोरखा समाचारसँग कुराकानी गर्दै गाउँपालिका प्रमुख गुरुङ भन्छन ‘लगानीको वातावरण निर्माण गरिदिन्छौ, त्यसको सुरक्षाको ग्यारेन्टी समेत गर्छौ, त्यसले इन्छुक व्यक्ति, सस्थाहरुलाई लगानीको लागि आब्हान छ ।’ पर्यटन उद्योगलाई लक्षित गर्दै नेपाल मै पहिलो पटक आउट डोर ग्यालेरी स्थापना, गोरखामा पहिलो पटक प्याराग्लाइडिङ सेवा, सामुदायिक वन भित्र सुविधा सम्पन्न होटल तथा रेष्टुरेन्ट निर्माण लगायतका कार्यक्रमहरु सुरु भइसकेको गुरुङले बताए ।
गाउँपालिका र जिल्ला वन कार्यालयको समन्वयमा सामुदायिक तथा कवुलियती वनमा व्यवसायिक रुपमा जडीबुटी खेती गरी सोही ठाउँमा प्रशोधनका लागि आवश्यक पुर्वाधार निर्माण गर्ने गरी प्रक्रिया अगाडी बढाइएको छ । ‘हाम्रो उदेश्य धार्चेलाई गोरखाको पर्यटनको केन्द्र बनाउने हो । त्यससँग सम्बन्धित बिकास पुर्वाधार अन्य लगानीका क्षेत्रहरुमा निजि क्षेत्रलाई मौका दिनुपर्छ भन्ने मान्यताका साथ हामी अगाडी बढेका छौ’ गुरुङले भने । धार्चे गाउँपालिका कला सस्कृतिको हिसाबले पनि धनि रहेको भन्दै गाउँपालिकाले स्थानीय सस्कृतिको जगे्रना गरी विभिन्न ठाउँमा होमस्ट्रे सञ्चालन गरेर पर्यटकलाई सुबिधा दिने योजना बनाएको छ ।
बिस्तारै उत्तरी गोरखा पनि सडक सञ्जाल सँग जोडिन थालेकाले परम्परागत पदमार्गहरु हराउने अबस्था सृजना भएको भन्दै त्यसको सरक्षण गरी नयाँ पदमार्ग पहिचान गर्ने गुरुङले बताए । ‘अब पुरानो किसिमले त्यहाँको बिकास हुँदैन हामी निति नियम निर्माण गछौं, त्यसमा स्थानीय जनता, विभिन्न सघं सस्था, निजि क्षेत्र सबैलाई सहभागी गराएर अगाडी बढाउँछौ ।’ सिमित सरकारी रकमले जनताको चाहना र तिब्र बिकासको आकाक्षा पुरा नहुने भएकाले सार्बजानिक निजि साझेदारी कार्यक्रमलाई जोड दिएको उनको दाबी छ ।
सो कार्यले उक्त क्षेत्रको बिकास र जनताको जिवन स्तर उकास्न मद्धत मिल्ने विश्वास लिइएको छ । ‘सरकारी क्षेत्रले मात्र काम गर्ने हो भने अब सय वर्ष पनि केही गर्न सकिदैन, बिकासका काम निजि क्षेत्रलाई पनि सँगसँगै लैजानुपर्छ, सबै मिल्यौं भने आर्थिक सम्बृद्धी छिटो आउँछ’ गुरुङले भने ।
सार्वजानिक निजि साझेदारी कार्यक्रमलाई कसरी प्रभावकारी बनाउन सकिन्छ भनेर आवश्यक अध्ययन गरी केही काम समेत थालनी गरिसकेको भन्दै उनले छिट्टै स्पष्ट खाका बनाएर औपचारिक ढङ्गले लगानीका लागि आग्रह गर्ने तयारी भइरहेको गुरुङले बताए ।