चैत्र १०, २०७४ दमौली — केही वर्ष वैदेशिक रोजगारीमा रहेर फर्केपछि कस्तो उद्यम गर्ने भनेर अलमलिने थुप्रै छन् । तनहुँको भिमाद १ सिमलस्वाराका ३८ वर्षीय दीनेश सिग्देल पनि यस्तैमध्येका एक हुन् ।
उनलाई हाल त्यो अलमल हटेको छ । सात वर्ष साउदी अरबमा बिताएका उनी साथीहरू कृष्णप्रसाद, दीपक, प्रकाश र ध्रुव सिग्देलसँग मिलेर सामूहिक कृषिमा काम गरिरहेका छन् । अग्रगामी पशुपालन तथा कृषि उद्योग स्थापना गरेका उनीहरूले परिवार र गाउँलेलाई पनि यसमा संलग्न गराएर आम्दानी लिन थालेका छन् । ‘हामीले गाउँका महिलालाई पनि उद्यमी बन्नुपर्छ भनेर फर्ममा साझेदार बनाएर काम गरिरहेका छौं,’ दीनेशले भने, ‘हाम्रा परिवार मात्रै होइन सबैको सहयोग छ ।’
स्वदेश फर्केका दाजुभाइ र गाउँका दिदीबहिनीले थालेको सामूहिक कृषि पेसाले राजधानीको शंकरदेव क्याम्पसमा स्नातकोत्तर पढ्दै गरेका गाउँका ओमकार सिग्देललाई पनि आकर्षित गरेको छ । ‘पढेर जागिर नै खानुपर्छ भन्ने छैन,’ उनले भने, ‘मलाई राम्रो लाग्यो, म पनि यसैमा संलग्न भएको छु ।’
१० युवाले जनही २५/२५ हजार रुपैयाँ लगानी गरेर १२ रोपनी क्षेत्रफलमा गत वर्षबाट सञ्चालनमा ल्याएको फर्ममा पहिलो चरणमा ब्रोइलर कुखुरापालन थालेका थिए । एउटा खोरमा ५ सय कुखुरा हालेर सुरु गरिएको फर्ममा हाल चारवटा खोर पुगेको छ । हाल ३ हजार ५ सय कुखुरा छन् । ‘लगानी करिब–करिब ३० लाख पुगेको छ, १४ जनाले काम गर्छन्’ दीपकले भने, ‘कुखुरापालन मात्रै होइन बहुद्देश्यीय कृषि भएकाले अरू धेरै योजना छन् ।’
kantipurdaily
