गोरखा समाचारदाता
माघ २४ गते । जिल्लामा पहिलो पटक चौरी गाईको दुधबाट चिज उत्पादन शुरु भएको छ । जिल्ला पशु सेवा कार्यालय गोरखाको चौरी संरक्षण कार्यक्रम अन्र्तगत गोरखाको चुमनुव्री गाउपालिका वडा नम्बर ७ छेकम्पारमा चिज उत्पादन शुरु भएको कार्यालयले जनाएको छ ।
पशुसेवा कार्यालयको समन्वय एवम अक्सफाम गोरखाको आर्थिक सहयोग र छुलेनिले चौरी संरक्षण समुहको सहकार्यमा गएको पुस २० गते पहिलो पटक चिज उत्पादन शुरु गरिएको बरिष्ठ पशु चिकित्सक जगतबन्धु नेपालीले जानकारी दिएका छन् ।
केही बर्ष अघि देखि कार्यालयले चौरी संरक्षण कार्यक्रम अन्तरगत चिज उत्पादन गर्ने गरि कार्यक्रम सुरु गरेको भएपनि प्रयाप्त बजेट नहुदा समस्या हुदै आएको थियो । तर यसै बर्ष देखि अक्सफाम र एकिकरण नेपालले कार्यालयले संचालन गरेको कार्यक्रममा सघाउदै चिज उत्पादन सुरु गरिएको अक्सफामका जिविकोपार्जन अधिकृत चित्र दाहालले बताएका छन् ।
छुलेनिले समुहले अहिले संयुक्त रुपमा समुह बनाएर दुध संकलन गर्ने र प्रसोधन गरी चिज उत्पादन सुरु गरेको छ । असार देखि मंसिर सम्म चौरीको दुध उत्पादनमा बृद्धि हुने भएकाले आगामी बर्षदेखि ब्यवसायीक रुपमा चिज उत्पादन अघि बढ्ने दाहालको भनाई छ ।
छेकम्पारबाट उत्पादन गरिएको चिज तत्कालका लागि मनासलु पदमार्ग क्षेत्रमा पुग्ने पर्यटकहरुलाई लक्षित गरी बिक्रि बितरण गर्ने तयारी लक्ष्य समुहले राखेको छ । चौरी गाइको दुधबाट उत्पादन भएको चिज प्रति केजी २२ सय देखि २५ सयसम्म बिक्रि हुने गर्दछ ।
