नरेन्द्र ढकाल/गोरखा
पुस ४ गते । भुकम्प आपत्तकालिन सहायता आयोजना अन्र्तगत स्तरउन्नती भइरहेको लुइँटेल भञ्जाङ–चित्रेपोखरी–भच्चेक सडकको काम सुस्त देखिएको छ । सम्झौता अवधिका आधारमा आधा काम सक्नु पर्ने भएपछी अहिले सम्म २५ प्रतिशत पनि काम हुन सकेको छैन् । ‘उहाँहरुले ५४९ दिनमा यो सडक पिच गरिसक्नुपर्छ, अहिले आधा समय सकिएको छ तर कामको प्रतिशत भने २५ भन्दा पनि तल छ’ जिल्ला प्राबिधिक कार्यालयका सिनियर डिभिजन इन्यिनियर होमनाथ पौडेलले भने ।
एसियाली बिकास बैङ्कको सहयोगमा लुइँटेल भञ्जाङ देखि आँपिपल, चित्रपोखरी हुँदै भच्चेक सडक स्तरउन्नतीको लागि दुई खण्डमा बिभाजन गरेर ठेक्का लगाइएको छ । ३० किलोमिटरको उक्त सडक लुइँटेल भञ्जाङबाट १७ किलो मिटर लामा अम्मर जेवी र बाँकी १३ किलो मिटर लामा कन्स्ट्रक्सनले ठेक्का पाएको छ । तर ठेकेदारले अनेक कारण देखाउँदै काम गरेको देखिदैन ।
‘वर्खामा काम गर्न सकिए, त्यसपछि चाडपर्व लाग्यो कामदार सबै घर गए’ निर्माण कम्पनीका एक कर्मचारीले भने ‘चुनाव पनि सकिएको छ कामदार पनि फर्किसकेका छन्, अब काम द्रुत रुपमा अगाडी बढ्छ ।’ हाल सम्म उक्त आयोजनामा सडक चौडा गर्ने, ग्रेड मिलाउने, ग्याबिङ लगाउने जस्ता काम भइरहेको छ । तर काम सोचे जस्तो ढङ्गले अगाडी नबढेको जिल्ला आयोजना कार्यान्वय इकाइले जनाएको छ ।
उक्त इकाइका प्रमुख एवं सिडि पौडेल भन्छन् ‘काम पटक्कै सोचे जस्तो भएको छैन्, हाम्ले ताकेताको गरी रहेका छौ ।’ ठेकेदारले प्रयाप्त मात्रामा जनशक्ति र श्रोत परिचालन नगर्दा काममा ढिलाइ भएको हो । आगामी असार मसान्त सम्म सम्पन्न गर्न यहि ढङ्गले भए आधा समेत सम्पन्न नहुने अवस्था देखिन्छ । ‘पिचको काम वर्खा अघि नै सक्नु पर्छ, जेठमा वर्खा सुरु भइहाल्छ, यही चाल हो भने ठेकेदारले काम गर्न मुस्किल छ’ पौडेलले भने ।
भुकम्प आपत्तकालिन सहायता आयोजना अन्र्तगत निर्माण उक्त सडक ६ मिटर २५ सेन्टिर चौडा हुनेछ । जसमा ३ मिटर ७५ सेन्टिमिटर पिच र बाँकीमा पदैलयात्रीका लागि बाटो र नाली बन्नेछ । सडक निर्माणका क्रममा सिरानचोक गाउँपालिका ५ तार्केडाँडा क्षेत्रमा बिवाद हुँदा सर्बे समेत हुन सकेको छैन् । पहिले द्रव्यशाह राजमार्गमा ट्रयाक खोल्दा वस्ती भन्दा टाढा जंगलको विचबाट लगिएको तर पछि स्थानीयले आफ्नै पहलमा वस्तीहुँदै सडक विस्तार गरेका थिए ।
अहिले बिस्तार भएको उक्त सडकलाई नै मान्यता दिएर सोही सडक पिच गर्नुपर्ने माग राखेपछि झण्डै १७ किलोमिटर सडकको सर्बे समेत हुन सकेको छैन् । ‘उहाँहरुले विवाद निकालेर सर्बे गर्न समेत गर्न दिनुभएको छैन्, त्यहाँ कटिङको काम समेत गर्न सकेका छैनौं’ पौडेलले भने । स्थानीयको माग अनुसार केन्द्रिय आयोजना कार्यन्वयन इकाइ र एसियाली बिकास बैङ्कको एक टोलीले उक्त क्षेत्रको अनुगम गरिसकेको छ ।
तर दाताले नयाँ सर्बे गर्ने विषयमा असहमती जनाएपछि पुरानै बाटोलाई स्त्तरउन्नती गर्नुपर्ने आयोजनालाई दबाब परेको छ । यता स्थानीयले भने उक्त कार्य जनताको हित विपरित भएको भन्दै बिरोध जनाइरहेका छन् । त्यसैगरी उक्त सडकको अधिग्रहणका लागि सुचना प्रकाशन गर्दा वास्तविक जग्गा छुट्न गएको भन्दै परेको उजुरीको छानबिन सकिएर सर्बे समेत भइसकेको पौडेलले बताए । ‘केन्द्रबाटै प्राबिधिकहरुको टोली आएर पुर्नसर्वेक्षण समेत गरिसकेको छ, अब उक्त समस्या हल हुन्छ’ उनले भने ।
उक्त सडकको काम सुस्त हुँदा आयोजनामा तोकिएको समयमै सम्पन्न नहुने आशंका बढेको छ ।