भाद्र ७, २०७४- इन्धन भण्डारणका लागि नेपाल आयल निगमले झापामा खरिद गरेको जमिनमा साविक मूल्यभन्दा तेब्बर बढी मूल्य तिरेको संसदीय समितिले ठहर गरेको छ ।

व्यवस्थापिका संसदको उद्योग, वाणिज्य तथा उपभोक्ता हित सम्बन्ध समिति मातहतको आपूर्ति उपसमितिले मेचीनगर १३ चारआलीस्थित जमिनको बुधबार स्थलगत अनुगमन गरेको छ । निगमले प्रदेश नं. १ को लागि इनधन भण्डारण गर्न भन्दै चारआलीमा २३ विगाह ३ कट्ठा १३ धुर जमिन खरिद गरेको छ । स्थलगत अनुगमनका क्रममा निगमले अस्भाविक मूल्यमा जग्गा खरिद गरेको पाएको अनुगमन टोलीका सदस्य सांसद दीपक कार्कीले बताए ।

निगमले उक्त जमिन प्रतिकट्ठा १३ लाख ५१ हजारका दरले खरिद गरेको जिल्ला मालपोत कार्यालयको मोठमा उल्लेख छ । तर, जग्गाधनीले भने प्रतिकट्ठा ४ लाख ४० हजार रुपैयाँ मात्र पाएको सांसद कार्कीले बताए । उनका अनुसार जग्गाधनीहरुले प्रतिकट्ठा ४ लाख ४० हजारदेखि ५ लाख ५० हजारसम्म मात्रै पाएका छन् । अन्य रकम आयल निगमले घोटाला गरेको उनले बताए ।

अनुगमन टोलीका अर्का सांसद रामवीर मानन्धरले निगमले प्रक्रिया मिलाएर जमिन खरिदमा करोडौं रुपैयाँ घोटला गरेको बताए । ‘निगमले सबै प्रक्रिया मिलाएर घोटाला गरेको छ । ४ लाख पनि नपर्ने जमिनलाई साढे १३ लाखमा खरिद गरिएको छ’ सांसद मानन्धरले भने,‘निगमको घोटाला स्थलगत अनुगमनबाट स्पष्ट भएको छ । झापामा मात्र कति घोटाला भयो भन्नेचाहिँ अन्तिम प्रतिवेदनमा उल्लेख गर्छौं ।’ उनले सडक छेउको जग्गाधनीले प्रतिकट्ठा ५ लाख ५० हजारका दरले तथा अन्य जग्गाधनीले अधिकतम् ४ लाख ४० हजारका दरले रकम पाएको बताए ।

५ लाख ५० हजारमा खरिद गरेको जमिनको सरकारी मूल्यांकन ५ लाख र अन्य जमिनको मूल्यांकन ३० हजार रहेको सांसद कार्कीले बताए । उनले राजु कार्कीको जमिन सडक छेउको भएकोले उनले ५ लाख ५० हजार प्रतिकट्ठाका दरले मूल्य पाएको बताए । भूपेन्द्र कार्की, दिलीप कार्की, दीपक कार्की, श्रीराम मरासैनी लगायत अन्य जग्गाधनीहरुले भने अधिकतम ४ लाख ४० हजारका दरले रकम पाएको सांसद कार्कीले बताए ।

जग्गाधनी भूपेन्द्र कार्कीले आफूहरुलाई झुक्याएर जमिन खरिद गरेको बताए । ‘हामीलाई केही थाहा थिएन । ३ लाख पर्ने जग्गा ४ लाख ४० हजार दिने भनेपछि मैले ३ विगाह बेचे’ उनले भने,‘तर, हाम्रो जग्गा कसले किन्दैछ । अरु कति किन्दैछ केही थाहा थिएन ।’ उनले जग्गा बिक्री गरे पनि जग्गाधनीहरुलाई राजीनामा पत्र नदिएको बताए ।

उनले भने,‘मलाई ३ विगाह जग्गाको हुन आउने रकम नेपाल इन्भेष्टमेन्ट बैंकको चेकमार्फत उपलब्ध गराए । राजीनामा पत्रलगायत अन्य कुनै कागजात मसँग छैन ।’ उनले आफूहरुको जग्गाबाट राज्यको करोडौं रकम लुटिएकोमा दु:ख लागेको बताए ।

नेपाल आयल निगमले इन्धन भण्डारणका लागि झापाको चारआलीमा खरिद गरेको जमिनको स्थलगत अनुमगन गर्दै संसदको उद्योग, वाणिज्य तथा उपभोक्ता हित सम्बन्ध समिति मातहतको आपूर्ति उपसमितिको टोली

तस्बिर : अर्जुन राजवंशी/कान्तिपुर