नेपाल इन्जिनियरिङ पेसाकर्मी सङ्घ (नेपा)को आयोजनामा शनिबार यहाँ आयोजित ‘बूढीगण्डकी जलविद्युत् आयोजना ः प्राविधिक, अर्थराजनीतिक र कानुनी प्रश्न’ विषयक अन्तरक्रिया कार्यक्रममा विज्ञहरूले त्यस्तो सुझाव दिनुभयो । राष्ट्रिय गौरवको आयोजनामा पर्ने बहुचर्चित जलाशययुक्त बूढीगण्डकी आयोजनाको काममा सरकारले विशेष ध्यान दिनुपर्ने उहाँहरूले बताउनुभयो ।

पूर्वप्रधानमन्त्री तथा नेकपा (एमाले)का वरिष्ठ नेता झलनाथ खनालले राष्ट्रिय गौरवका आयोजना सकेसम्म नेपाली स्रोतसाधनले निर्माण गर्दा उपयुक्त हुने भए पनि आर्थिक समस्याले विदेशी कम्पनीलाई दिनुपर्ने बाध्यता रहेको बताउनुभयो । बूढीगण्डकीजस्तो आयोजनालाई नेपालले आफैँ निर्माण गर्न नसक्दा चिनियाँ कम्पनीलाई दिनु परेको चर्चा गर्दैै आयोजना निर्माणको चरणमा नेपाली हितमा ध्यान दिनुपर्छ भन्नुभयो ।

जलविद्युत्विज्ञ डा. डम्बर नेपालीले बूढीगण्डकीजस्तो आयोजनालाई नेपाली पैसा र स्रोतसाधनले निर्माण गर्ने सम्भावना रहँदारहँदै सरकारले चिनियाँ कम्पनीलाई दिएको गुनासो गर्नुभयो । सकेसम्म आफ्नै स्रोतसाधनको सदुपयोग गर्नेतिर हामीले ध्यान दिनुपर्छ, विदेशीले बनाइदिन्छन् भनेर मक्ख पर्दा नेपाललाई घाटा हुने उहाँले तर्क गर्नुभयो ।

बूढीगण्डकी जलविद्युत् आयोजना विकास समितिका पूर्वअध्यक्ष डा. लक्ष्मीप्रसाद देवकोटाले जल, खाद्य र ऊर्जा सुरक्षा नहुँदासम्म मुलुक स्वाधीन हुन नसक्ने बताउनुभयो । बूढीगण्डकी जलविद्युत् आयोजनाको निर्माणले त्यस क्षेत्रको पर्यटकीय विकास पनि हुने उहाँले चर्चा गर्नुभयो । त्यस आयोजनाको निर्माणले मुलुकको अर्थतन्त्रसमेत सबल हुने दाबी उहाँले गर्नुभयो ।

जलस्रोतविज्ञ डा. नारायण चौलागाईं र डा. विष्णुप्रसाद शर्मा नेपालले बूढीगण्डकी जलविद्युत् आयोजनाको निर्माण, सम्झौता र नेपाललाई हुने फाइदा र बेफाइदाका बारेमा प्रकाश पार्नुभएको थियो । सरकारले चिनियाँ कम्पनीसँग सम्झौता गर्दा हल्का तरिकाले सम्झौता गरेको र नेपालको हितमा खासै ध्यान दिन नसकेको उहाँहरूको टिप्पणी छ । कार्यक्रममा डा. राजेन्द्र अधिकारी, छवि पोखरेल, हरिराम श्रेष्ठ लगायतले बूढीगण्डकी जलविद्युत् आयोजनाका बारेमा चर्चा गर्नुभएको थियो ।

gorkhapatraonline