पेट्रोलियम ढुवानी व्यवसायी महासंघको १२ औं साधारणसभा तथा छैठौं महाधिवेशनको उद्घाटनका क्रममा उनले स्टोरेज बनाउन सरकारको निर्देशन भएकोले कसैले रोक्न नसक्ने बताए ।

‘पत्रकार साथीहरु यहाँ हुनुहुन्छ भनेपनि तपाइँहरुले आज लेख्नुस्,’ कार्यक्रममा उनले भने, ‘कत्रो अक्षरमा लेख्नसक्नुहुन्छ लेख्नुस् । निगमले ५ वर्षभित्र स्टोरेज बनाएरै छाड्छ । हामीलाई सरकारको निर्देशन छ ।’

५ वर्षभित्र ९० दिनको लागि स्टोरेज बनाउन आफ्नो बलिदानी दिन पनि तयार रहेको उनले सुनाए । ‘स्टोरेज बन्छ, बनाउनुपर्छ र त्यो जसरी पनि बनाइने छ,’ उनले भने, ‘त्यसको लागि ज-जसले बलिदानी दिनुपरेपनि दिउँला । सबभन्दा पहिले त मैले पर्ला, त्यसको लागि पनि म तयार छु ।’

यद्यपी उनले सञ्चारमाध्यममा आएका विभिन्न कुरामा निगमले भनिरहनुपर्ने केही नभएको भन्न भ्याए । ‘पत्रपत्रिकाले धेरै लाञ्छना लगाएका छन्,’ उनले भने, ‘यस्तो लाञ्छनाले खासै फरक पार्दैन । आयल निगमको मनोबल उच्च नै छ ।’

उनले पेट्रोलियम पदार्थ ढुवानी कम्पनीलाई ठेक्कामा दिन टेन्डर आह्वान गर्नेबारे निगमले कुनै गृहकार्य नगरेको बताए । पेट्रोलियम पदार्थ ढुवानीलाई अझै सहज बनाउ र व्यवसायको सुनिश्चितता गर्ने विषयमा आयल निगम संवेदनशील रहेको उनले उल्लेख गरे । उनले भने, ‘निगमले यहाँहरुको व्यवसाय सहज गराउन संवेदनशील भएर लाग्छ । यसमा म हुदाँसम्म ढुक्क भए हुन्छ ।’

अव्यवहारिक कुरामा सम्झौता गर्दिनँ – आपूर्तिमन्त्री 
कार्यक्रमको उद्घाटन गर्दै आपूर्तिमन्त्री शिवकुमार मण्डलले मन्त्रालयभित्रका विकृति, अनियमितता र अव्यवहारिक कुरामा कुनै पनि हालतमा सम्झौता नगर्ने बताए । ‘कसैले राम्रो गरेको आधारमा आग्रह पूर्वाग्रह राख्न आवश्यक छैन,’ कार्यक्रममा उनले भने, ‘गलत गरिएको छ भने शिवकुमार मण्डलले छोड्दैन ।’

उनले पेट्रोलियम पदार्थ ढुवानी देखिने नोक्सानीको स्थायी समाधानको आवश्यकता औंल्याए । हाल व्यवसायी र सरकारबीच झारा टार्ने सहमति मात्रै भएकोले आवश्यक प्रविधि र प्राविधिक ल्याएर भएपनि स्थायी समाधान खोज्नुपर्ने उनको भनाइ थियो ।