कैलासबावु श्रेष्ठ/गोरखा
साउन १० गते । जिल्ला प्रशासन कार्यालय गोरखाले आफ्नो कार्यालयमा आउने सेवाग्राहीबाट गएको आर्थिक बर्षमा मात्रै २ करोड ६४ लाख २३ हजार ५३ रुपैयाँ राजश्व उठाएको छ । विभिन्न ८ शिर्षकमा कार्यालयले गएको आर्थिक बर्षमा उक्त रकम राजश्व उठाएको हो । ‘कार्यालयबाट सेवा प्रदान भएका विभिन्न शीर्षकहरुबाट २ करोड भन्दा बढि राजस्व संकलन भएको छ’ लेखापाल हर्क बहादुर रोकाले भने ।
कार्यालयले सेवाग्राही मध्ये नेपाली राहदानी बाट २ करोड ५७ लाख ४० हजार रुपैयाँ राजश्व संकलन गरेको छ । आर्थिक बर्ष ०७३÷०७४ मा कार्यालयले ७ हजार १ सय ७ थान नेपाली राहदानी बिक्रीबाट मात्रै उत्त रकम बरावरको राजश्व संकलन गरेको हो ।
यसैगरी नाबालकबाट प्रति राहदानी २ हजार ५ सय, पासपोर्ट हराएर प्रतिलिपी लिन आएमा १० हजार र सामान्य राहदानी बाट प्रति राहदानी ५ हजार गरी उक्त राजश्व संकलन भएको लेखापाल रोकाले बताए । कार्यालयको रेकर्ड अनुसार कम्पनी रजिष्ट्रेशन दस्तुर (संस्था दर्ता, नविकरण र जरिवाना) ४ लाख ३६ हजार, न्यायिक दस्तुर (मुद्वा फैसला, दण्ड एवं जरिवाना, मादक पदार्थ सेवन) बाट १ लाख ५७ हजार ५ सय र प्रशासनिक दण्ड, जरिवाना तथा जफज शिर्षकमा ६२ हजार २ सय ४३ रुपैयाँ राजश्व संकलन भएको छ ।
यसैगरी परिक्षा शुल्क (बढुवाका लागि गरीने परिक्षा) बाट १२ हजार ४ सय रुपैयाँ र हात हतियार दर्ता तथा नविकरणमा ७ हजार ५ सय रुपैयाँ, सार्वजनिक सम्पत्ती बिक्री बाट ६ हजार ८ सय तथा अन्य बाट ६ सय १० रुपैयाँ गरी कुल २ करोड ६४ लाख २३२ हजार ५३ रुपैयाँ राजश्व संकलन भएको हो ।